Vetëm tre ditë nga nata e ndërrimit të viteve, pensionistët e Fierit janë dyndur në dyert e Postës Shqiptare, në pritje për të marrë shpërblimin e premtuar nga Kryeministri Edi Rama.
Ata thonë për “Fax News” se në sportele iu deklarojnë se nuk ka para, dhe kjo ka bërë që për ditë të tëra, ata të qëndrojnë me orë në radhë, duke sfiduar gjunjtë që nuk iu mbajnë nga vitet, e të ftohtin e dimrit, ndërsa nuk e fshehin irritimin me këtë gjendje.
Më tej, pensionistët shtojnë se me ato para kishin menduar që të bënin dhe blerjet për darkën e ndërrimit të viteve.
“Sa ditë thuaj, jo sa kohë, kjo është dita e katërt që vij këtu, jo hajde sot jo hajde nesër. Na thonë që do të vinë”, shprehet një prej të moshuarve në radhë.
Ndërkohë një zonjë në moshë tregon se qëndron në patericë, dhe askush nuk do t’ia dijë për gjendjen e tyre.
“Një javë kam që rri këtu me patericë, erdhi dhe viti i ri dhe nuk kemi marrë asgjë, nuk do t’ia di njeri për ne”.
Një e moshuar, e cila vjen nga fshatrat e Fierit, duke shpenzuar edhe para për transportin, çdo ditë, ka një rekomandim për qeverinë, nëse nuk kanë para, më mirë të mos premtonin shpërblim.
“Kam një javë që pres, e hënë në të hënë, 9 ditë sot, një javë rresht në pritje këtu. Po të mos kishin lekë mos të na jepnin fare, se po vijmë dhe po torturohemi këtu, nuk ka lekë na thonë. Unë marr pension kooperative, kam punuar si qeni, dhe marr 80 mijë lekë. Ne po torturohemi, kemi një javë këtu që presim për ti marrë”, tregon zonja.
Discussion about this post