Interi bëhet gati për ndeshjen më të rëndësishme të dekadës së fundit për klubin zikaltër. Skuadra italiane luan në finalen e UEFA Champions League ndaj Cityt dhe sigurisht që për të është një sfidë e rëndësishme për një trofe shumë prestigjioz.
Por si zakonisht kur Interi shfaqet në skenën e rëndësishme, ashtu shfaqen edhe zërat për shitjen e klubit. “New York Times” ka bërë të ditur sot se lombardët vazhdojnë të jenë në shitje, pavarësisht këtyre sukseseve dhe kjo finale është platforma më e mirë për të reklamuar atë që mund të gjejnë blerësit potencialë.
Burimet e gazetës së famshëm amerikane bëjnë të ditur se janë shumë persona, grupe interesi apo fonde investimi të interesuara për të blerë klubin italian. Por për momentin askush prej tyre nuk ka bërë një ofertë konkrete apo është ulur për të diskutuar me pronarin aktual, Stiven Zhang.
Çmimi prej 1,2 miliard eurosh që ky i fundit i ka vënë Interit, nuk duket se bind për momentin blerësit potencialë. Por një triumf i mundshëm në finalen e kompeticionit më të rëndësishëm në botë, mund t’i japë një shkëlqim tjetër zikaltërve dhe të bëjë realitet idenë e drejtuesit për të shitur klubin.
Discussion about this post