Kryebashkiakët shpenzojnë këtë fundviti qindra milionë lekë vetëm për zbukurimet, drita dhe fishekzjarrë. Sot do të tregojmë se si 9 bashki kanë shpenzuar 526 milionë lekë vetëm për dekore.
Po ja nisim nga Bashkia Tiranë duke qenë se deri më tani ka raportuar 4 tendera të ndryshëm për dekore me vlerë 290 milionë lekë. Vetëm për fishekzjarrë kryebashkiaku Erion Veliaj do të shpenzojë 30 milionë lekë. Jo vetëm që këto shifra i tejkalojnë vlerat e vërteta që harxhohen për këtë qëllim, por është e qartë se shumica e parave mbushin llogaritë e miqve të kryetarit Veliaj.
Më tutje vërejmë se 96 milionë lekë kryetari Veliaj i ka dhënë vetëm për të blerë vargje dritash, me siguri ato drita që po vendosen në godinën e bashkisë.
Nuk dimë sa do t’i shijojë kryebashkiaku këto zbukurime, pasi SPAK po i vjen rrotull për pasurinë e vënë me korrupsion, por ai ka guxuar që edhe këtë tender ta bëjë pa garë.
Në dokument shihet që u dorëzuan dy oferta për këtë tender, por njëra u skualifikua në fazën e parë, pasi nuk ka dorëzuar mostrat e fishekzjarrëve në afat. Me këtë argument shkoi në fazën e fundit vetëm firma “ARTEO 2018”, e cila është shpallur menjëherë fituese pa garë. Kjo kompani ka pronar Artan Topin dhe nuk është rastësish përfituese e këtij fondi. Kompania ka fituar mbi 150 tendera duke u favozizuar në këtë formë nga zyrtarët.
Edhe vitin e kaluar, me të njëjtën shumë, tenderi iu dha kësaj kompanie.
Më tutje Bashkia Tiranë kë blerë 100 milionë lekë dekore të tjera tek firma “Iceberg Communication” SHPK, në pronësi të biznesmenes Rafaela Rica, e njohur se çdo fundvit mbulohet me para nga bashkitë. Ndërkohë 65 milionë lekë të tjerë janë shpenzuar për të blerë zbukurime për Parkun e Liqenit Artificial. Shohim që çdo drejtori ka bërë shpenzime për hesap të vetë dhe kjo i ka leverdisur Lali Erit, prandaj i ka konfirmuar njëri pas tjetrit.
Shpenzimet e Vitit të Ri të kryetares Sako
Vendin e dytë për shpenzime për festat e mban Bashkia Durrës. Me kryetare Emiriana Sakon, që ka zhvilluar tenderin me objekt “Blerje Dekori, viti 2024” dhe fond limit 58 milionë lekë. Siç mësojmë jenë planifikuar shpenzime të tjera për fishekzjarrë, por do të publikohen më vonë. Ndërsa kontratën e këtij tenderi Sako e mban ende larg syve të publikut, pra nuk e ka publikuar akoma në Agjencinë e Prokurimeve Publike.
E lëshon dorën edhe Filo
Dhe vendin e tretë për shpenzime pa kriter për llamburitjen e fundvitit zë Bashkia Korçë, e cila ka shpenzuar 64 milionë lekë. Kjo bashki ka zhvilluar dy tendera. Një prokurim ka si objekt “Shpenzime dekori (ndriçues dekorative)”, me vlerë 30 milionë lekë dhe një tjetër kontratë me objekt “Blerje elemente dekorative te ndriçuar” me vlerë 34 milionë lekë. Në fakt, referuar çmimeve të tregut, me vetëm njërin prej fondeve mund të ishin blerë të gjitha zbukurimet.
Pas Filos për harxhime të tilla vjen Fisnik Qosja i bashkisë Kavajë. Megjithëse është demokrat nga prejardhja politike, ky i fundit është si dy pika uji me paraardhësin socialist. Ai ka zhvilluar tenderin me objekt “Shërbimi i dekorit të festave të fundvitit”. Do të blihen vetëm drita të llojeve të ndryshme si dhe disa kabllo ndriçuese gjithashtu që kthehen në forma të ndryshme.
Vetëm për kaq do të shpenzohen 41 milionë lekë. Pra e qartë që do të bëhen edhe shpenzime të tjera!
Blerjet e zbukurimeve për këtë fundviti i ka bërë edhe Bashkia Sarandë, drejtuar nga Oltion Çaçi. Më 13 nëntor 2024, kryetari ka zhvilluar tenderin me objekt “Blerje materiale dekori”, me vlerë 25 milionë lekë. Pas saj vjen Bashkia Kurbin, e cila ka shpenzuar 19 milionë lekë.
Edhe bashkia Shijak që ka vetëm një shesh për të zbukuruar ka shpenzuar 16 milionë lekë. Dhe më pak shpenzime ka bërë bashkia Përrenjas e cila ka paguar vetëm 8 milionë lekë për shpenzime zbukurimi!
Fondet janë të njëjta si vitin e kaluar, prandaj një pyetje na lind: Çfarë bëhet me zbukurimet që blihen çdo vit? Vetëm me një përdorim janë dritat dhe dekoret?
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet .nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post