Sot për herë të parë në vendin tonë do të futet sistemi i VAR, i cili do të përdoret në ndeshjen për Superkupën e Shqipërisë midis Teutës dhe Vllaznisë.
Kjo ndeshje do të luhet në orën 19:00 në ‘Elbasan Arena’ dhe FSHF ka vendosur që përballja mes kampionëve të Superligës dhe Kupës së Shqipërisë të gjykohet nga Kridens Meta, i ndihmuar nga Rejdi Avdo, Dojando Myftari dhe Juxhin Xhaja.
Delegat i kësaj sfide do jetë Marjus Sulejmani ndërsa vëzhgues Sokol Jareci. Arbitër i VAR është caktuar Enea Jorgji, ndërsa asistent Denis Rexha.
Rikujtojmë se stadiumi do jetë hapur për tifozët në 30% të kapacitetit, pra këtë supersfidë do lejohen ta ndjekin nga afër rreth 3700 tifozë./Gijotina.com
