Në orën 18:00 do të nisë takimi i ish-kryeministrit Sali Berisha me demokratët e Durrësit në Pallatin e Kulturës në këtë qytet. Pak para nisjes se takimit ka mbërritur deputeti Edi Paloka dhe Flamur Noka të cilët do të jenë të pranishëm si mbështetës të Berishës.
Qytetarët janë mbledhur në sheshin “Liria” përballë Pallatit të Kulturës.
Takimin Berisha e njoftoi në faqen e tij në Facebook, si dhe ftoi demokratët t’i bashkohen. Ai pas përjashtimit nga grupi parlamentar i PD-së ka ndërmarrë një aksion politik për largimin e kryetarit Lulzim Basha.
Në 3 takimet e mëparshme, të mbajtura në Tiranë, Vlorë e Fier, e ka akuzuar Bashën si të shitur tek Rama.
Ish-kryeministri ka nisur mbledhjen e 1500 firmave të anëtarësisë për të mbledhur Kuvendin Kombëtar të partisë kundër Bashës.
Ndërkohë, Basha u shpreh javën e kaluar për median se nuk do të lejojë asnjë Kuvend partie të mblidhet për të shqyrtuar vendimin e SHBA-ve.
