Erion Veliaj gjen çdo ditë mënyrën për t’i kënaqur bashkëpunëtorët me fondet e bashkisë. Këtë herë “do të rregullojë” rrëmujën që kanë bërë punonjësit e Ujësjellësit nëpër lagje, ku ndryshojnë çdo muaj tubacionet ose shpërthen uji në rrugë.
Në fotot më poshtë shohim vetëm tre nga rrugët në të gjithë qytetin që kanë mbetur në këtë gjendje prej kohësh, pasi punonjësit e ujësjellësit kanë futur tubat e reja dhe nuk i kanë mbyllur më gropat me asfalt. Megjithëse paratë janë harxhuar që rruga të sillej në gjendjen e mëparshme, gropat janë lënë të hapura dhe dita ditës rrugët janë degraduar. Në fat po e marrim të mirëqenë, se janë gjurmët e ujësjellësit, por janë edhe kompanitë e internetit që nuk kanë lënë rrugë e trotuar pa çarë.
Degëzim i rrugës “Asim Vokshi”
Rruga “Kongresi i Tiranës”
Sigurisht, qytetarët kanë bërë denoncime thirrje që këto pjesë të riparohen dhe mbyllen, por askush nuk ua ka vënë veshin. Madje dhe në rrugët e reja, sistemi i kanalizimeve është bërë pasi ka përfunduar shtrimi me asfalt.
Tenderi pa garë
Por, mos prisni shumë nga Erion Veliaj dhe drejtori i tij në Ujësjellës! Ai e ka mendjen si të përvetësojë fondet në bashkëpunim me një grusht biznesmenësh të privilegjuar, jo të mbyllë rrugët. Më datë 13 shtator 2023 kryebashkiaku i Tiranës ka firmosur tenderin me objekt “Sistemim, Asfaltim dhe kthim në gjendjen fillestare të segmenteve rrugore pas ndërhyrjes në rrjetin e Ujësjellësit dhe Kanalizimeve në qytetin e Tiranës për vitin 2023”.
Pra për të bërë një punë, që nuk e përfunduan si duhet ata që e nisën, taksapaguesit në Tiranë do të paguajnë 320 milionë lekë, të cilat ka më shumë mundësi të zhduken në xhepat e korrupsionit me oligarkët.
Madje si fitues paraprak, Njësia Vendore përmes Ujësjellësit Tiranë, nuk ka zgjedhur 1 por 4 kompani.
Së pari, duhet të theksojmë se ata e kanë marrë tenderin pa garë. Ku siç thekson edhe vlerësuesi Open Data Albania janë skualifikuar të gjithë operatorët e tjerë pa një shpjegim në bazë të ligjit mbi prokurimet. Katër kompanitë e mbetura janë shpallur të gjitha fituese pa konkurrencë. Ky tender sipas Open Data, ka risk të lartë korrupsioni me fondin e prokuruar.
Shohim që këta katër të privilegjuarit e kësaj here janë operatorët 2 N sh.p.k; S I R E T A 2F sh.p.k; FUSHA sh.p.k dhe K.M.K sh.p.k.
Përfituesit
Kompania e fundit është në pronësi të Kelmend Mehmet Caushaj, pra djali i biznesmenit Mehmet Caushaj, i njohur për aferat me tenderët sidomos në sektorin e ndërtimit.
FUSHA sh.p.k duket si strumbullari i këtij projekti, sepse Shkëlqim Fusha dihet tashmë që është miku më i mirë i Erion Veliajt dhe ndërtuesi i disa kullave në kryeqytet, pjesë e aferës së Piramidës dhe Teatrit.
Ndërsa firma S I R E T A 2F sh.p.k rezulton në pronësi të Fatime Pali, që në fakt udhëhiqet nga bashkëshorti i saj Fiqiri Pali, i cili është edhe themeluesi i kësaj firme. Madje Fiqiriu është ai që i siguron kontrata të majme përmes lidhjeve që ka. Ai njihet për faktin që është dënuar më parë për ryshfet dhe falsifikim dokumentesh. Mos u habisni, miqtë e Lali Erit e kan nga një cen, por ia kthejnë nderin kryebashkiakut.
Pali u arrestua dhe u dënua në vitin 2008, si pjesë e një skeme korrupsioni, ku vidheshin paratë publike me tenderë abuzivë.
Skema funksiononte me disa institucione, por policia dhe prokuroria dokumentoi një aferë me Ministrinë e Punës dhe Shanseve të Barabarta. Fiqiri Pali, në bashkëpunim me Llambi Tarkën u akuzuan në atë kohë se korruptuan zyrtarin e lartë të Ministrisë së Punës dhe Shanseve të Barabarta, Spartak Gjini, duke paracaktuar tenderin e rikonstruksionit të ministrisë dhe duke ndarë fitimet bashkë.
Pali u dënua në 2 maj të vitit 2008. Dënimi i tij është konfirmuar nga Gjykata e Apelit dhe më pas nga Gjykata e Lartë. 12 ditë më pas ai kaloi aksionet tek e shoqja, për të rregulluar biografinë e kompanisë. Kështu Veliaj gostit miqtë e tij me 320 milionë lekë, ndërsa por kryeqytetasit do t’i kenë rrugët e lagjeve copë -copë e tërë baltë.
Lexo edhe: Shkëlqim Fusha mbledh edhe “qindarkat” nga Lali Eri, merr 77 MLN lekë për pastrimin e parkimeve
\©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post