Më në fund Qeveria ka publikuar në fletoren zyrtare vendimin për shkarkimin e Safet Gjicit si Kryebashkiak I Kukësit. 10 ditë pasi publikisht Qeveria njoftoi se shkarkonte Gjicin, pas publikimit të video-skandalit, vendimi është publikuar në Fletoren Zyrtare, ndërsa mes vendimeve të Qeverisë, në faqen zyrtare, ai nuk ishte publikuar, si çdo akt tjetër.
Vendimi mban datën 16 qershor, pra ditën kur edhe u njoftua, ndërsa ai është marrë me arsyetimin “për shkak të shkeljeve të rënda”
“VENDIM Nr. 367, datë 16.6.2023 PËR SHKARKIMIN NGA DETYRA TE KRYETARIT TË BASHKISË KUKËS, Z. SAFET GJICI
Në mbështetje te neneve 100 e 115, pika 1, të Kushtetutës, dhe të shkronjës “a”, të nenit 62, të ligjit nr. 139/2015, “Për vetëqeverisjen vendore”, të ndryshuar, me propozimin e Kryeministrit, Këshilli i Ministrave VENDOSI: Shkarkimin nga detyra, për shkak të shkeljeve të rënda, të kryetarit të Bashkisë Kukës, z. Safet Gjici. Ky vendim hyn në fuqi menjëherë dhe botohet në Fletoren Zyrtare”.
Pas publikimit të video-skandalit nga zyra e tij, ku ai shfaqet në momente intime, Gjici dha dorëheqjen, më pas erdhi shkarkimi i tij. Ndërsa me vendim të GJKKO ndaj ish-Kryebashkiakut të Kukësit është vendosur masa e sigurisë “arrest me burg”, me akuzën e “korrupsionit pasiv”, sot gjithashtu është publikuar në Fletoren Zyrtare edhe vendimi për shkarkimin e tij si kryebashkiak.
Më 16 qershor, Gjici u shfaq në një video të publikuar online duke kryer marrëdhënie seksuale me një grua në zyrën e tij në Bashkinë e Kukësit. Më vonë, u publikua një tjetër fragment i asaj videoje ku Gjici diskutonte me vajzën në fjalë për mundësinë e akordimit të saj të një tenderi për menaxhimin e qenve endacakë të qytetit të Kukësit.
Në një postim në rrjetet sociale pas publikimit të videos, Gjici kërkoi falje dhe tha se prej disa kohësh kishte lidhje intime me vajzën në fjalë, si dhe akuzoi kundërshtarët politikë.
Discussion about this post