Ditën e hënë në orën 13:45 Kukësi do të përballet me skuadrën e Laçit në transfertë në ndeshjen e vlefshme për javën e tretë të Superligës.
Ndërsa ka folur në prag të këtij takimi, kapiteni i Verilindorëve Gjelbrim Taipi është shprehur se kjo është një ndeshje shumë e vështirë megjithatë fakti që do luhet në Kamëz e favorizon ekipin e tij pasi aty jetojnë shumë kuksianë.
“Nesër do të jetë një ndeshje tepër e rëndësishme, mund të jetë dhe një provë kryesore për ekipin tonë. Do të provojmë aftësitë tona edhe pse do të jetë e vështirë sepse i dimë aftësitë e skuadrës së Laçit, edhe e dimë se janë shumë të përgatitur. Në Kamëz jetojnë një numër i madh të qytetarëve kuksianë, kështu që do të jetë një ndihmë shumë e madhe sepse do të na përkrahin maksimalisht dhe uroj dhe shpresoj që të mos i zhgënjejmë”, tha mesfushori.
Ndërsa në dy javët e para Kukësi ka marrë vetëm fitore, duke qëndruar kështu në krye të tabelës së Abissnet Superiore me gjashtë pikë./K.T/Gijotina.com
