Ish ministri i Mjedisit Lefter Koka i cili është një nga të arrestuarit për aferën e inceneratorëve, ka hedhur poshtë akuzat duke pretenduar se është i rregullt me procedurat.
“Nuk kam shpërdoruar detyrën. Kam zbatuar të gjithë procedurën dhe kërkesat ligjore. Për shpronësimin, është ngritur një Komision i Posaçëm”, ka dëshmuar ish-ministri.
Pas 3 orë e 30 minutash përballje me SPAK ku është marrë në pyetje për çështjen e quajtur “vjedhja e shekullit”, Koka shprehet se nuk i njeh shoqëritë e inceneratorit të Fierit. Ai tha se duhet ta gjejë SPAK se kush janë shoqëritë që kanë marrë lekët.
“Mospublikimi i ofertës tenderuese në fletoren evropiane është bërë për shkak se në rastin në fjalë nuk parashikohej në ligj. Kompanitë që flitet se kam marrë lekë nuk i njoh”, është shprehur më tej në dëshminë e tij ish-ministri.
Ndërsa sa i takon procedurave për shpronësimin nga tokë arë në truall, Koka ka pretenduar para organit të posaçëm të akuzës se ajo pronë nuk është trajtuar kurrë si truall por si tokë are e shpronësuar.
SPAK akuzon Kokën se ka përfituar ryshfet në vlerën e 3.7 milionë eurove nëpërmjet kompanive fiktive të zotëruara nga familjarë dhe të njohur të tij. Hetimet disa mujore zbuluan se Lefter Koka favorizoi pronarët dhe administratorët e kompanisë lidhur me koncesionin e inceneratorit të Elbasanit.
Discussion about this post