Përcillet për në banesën e fundit Mateo, mijëra qytarë i japin lamtumirën 8-vjeçarit

Përcillet në banesën e fundit 8-vjeçari Mateo Vasia. Vogëlushi që u rrëmbye ditën e djeshme nga fqinji kriminel Klodian Çalamëni dhe u vra e gropos në oborrin e banesës është përcjellë nga qindra njerëz, banorë të fshatit, por edhe të afërm të tjerë të ardhur nga zona të tjera.

Të gjithë janë në lot për vogëlushin që u vra tragjikisht nga 38-vjeçari teksa kishte dalë të luante me biçikletë si çdo ditë të fëmijërisë së tij.

Në ceremoni merrte pjesë edhe deputeti Taulant Balla si dhe kryetari i Bashkisë Fier Armando Subashi.
Balla tha se për autorin duhet të jepet dëniumi maksimal, ndërsa pohoi se u miratua ndihmë financiare për familjen e vogëlushit 8-vjeçar.

“Ngjarje e rëndë. Ajo që na bën të jemi përgjgjegjës është nevoja që të kërkojmë në mënyrë të menjëhershme nga Prokuroria dhe gjykata ndëshkim maksimal për këtë kalbësirë të shoqërisë. Bashkë me kryetarin e Bashkisë kemi qënë pranë familjes, kemi miratuar një ndihmë financiare për familjen. Do ti gjendemi pranë familjes. Fjale për të ngushëlluar këtë familje nuk ka”- u shpreh Taulant Balla.

Nga ana tjetër, kryetari i Bashkisë Fier Armando Subashi bëri thirrje për të gjithë të solidarizohen për rastin e rëndë, ndërsa tha se në orën 12.00 do mbahet një minutë heshtje për Mateon, i cili u vra në mënyrë barbare nga fqinji i tij.

“Ngjarje të tilla meritojnë më shumë vëmendje dhe reflektim, për tu futur thellë në shkaqet që cojnë në ngjarje të tilla. Personi ishte i vetëm, i ati i kishte vdekur. ne i kemi ofruar punë para disa kohësh në një nga ndërmarrjet e Bashkisë, u largua. Besoj se ka pasur ndikim, megjithëse vrasim mendjen dhe gjejmë motiv se përse mund ta kishte bërë por nuk ka justifikim. Ngjarje të tilla nuk ka justifikim. Sot duhet të reflektojmë, të solidarizohemi, në orën 12 do të mbajmë 1 minutë heshtje, kudo, në rrugë, makinë, është momenti që të solidarizohemi. Ka pasur momente të caktuara që është trajtuar me ndihmë ekonomike.
Ai ka qënë i dënuar dhe më parë, që nga 2006 e deri më sot kanë kaluar vite. Nga ana e policisë ka qënë në listën e personave problematikë, inspektorët e kanë pasur në vëzhgim, por nuk mundën që ta ndalonin këtë ngjarje. Një mendje normale nuk mund ta imagjinonte, aq më tepër që familjarët e djalit e ndihmonin. Nuk ka fjalë.
Jo nuk kemi pasur ankesa dhe informacion, mesa u interesova në polici nuk ka pasur probleme, ankesë apo rast konkret”- tha kreu i bashkisë së Fierit.