Heroi Anri Kashiku, po përcillet sot për në banesën e fundit në Shënvlash të Durrësit. 19-vjeçari humbi jetën ditën e djeshme teksa tentoi të shpëtojë vëllain dhe një shokun e tij që po rrezikonin të mbyteshin. Ai arriti të shpëtonte dy jetë, por vetë nuk mundi të dalë i gjallë në Bishtë Pallë të Durrësit. Mes lotësh, të afërmit dhe fqinjët shprehin ngushëllimet për ngjarjen e rëndë. Të shokuar nga ajo që ka ndodhur, ata vlerësojnë aktin e tij heroik, ndërsa luten që Zoti t’u japë forcë prindërve. Një fqinje e përshkruan atë si djalë të urtë dhe se këtë vit kishte mbaruar gjimnazin.
“I urtë, i dashur, nuk bënte fjalë me askënd. Djalë hero që shpëtoi vëllain e vet dhe një komshi. Për vete vdiq. Ne po përjetojmë një dramë shumë të madhe. Mbaroi maturën këtë vit”, thotë ajo për gazetarët. “Na vjen keq për të. Është një dhimbje e rëndë”, shprehet një tjetër.
Ngjarja tragjike ndodhi rreth mesditës së djeshme, kur deti filloi të trazohej, ndërsa dy të miturit po rrezikonin mbytjen. Anri Kashiku sapo i pa hyri për t’i shpëtuar, por vetë nuk mundit të mbijetonte. Trupi i tij i pajetë u gjet rreth 20 metra nga bregu.
Discussion about this post