Rëndohet akoma më shumë historia e përdhunimit të 11-vjeçares në Kosovë nga 5 persona. Sipas dosjes, e mitura ishte në përgjegjësinë e institucioneve të shtetit të Kosovës për një rast të ngjashëm në të cilin pretendohej se ishte viktimë e trafikimit.
“Telegrafi” raporton se Prokuroria e Shtetit e Policia e Kosovës nuk kanë sqaruar nëse bëhet fjalë për dosje të abuzimit seksual apo për trafikim me qëllime të tjera mirëpo burime zyrtare kanë konfirmuar se vajza ishte marrë në mbrojtje dhe ishte nën mbikëqyrjen e Qendrës për Punë Sociale në Prishtinë.
Drejtori i Zyrës për Mbrojtjen e Viktimave në Prokurorinë e Shtetit, Demë Hasanaj, ka konfirmuar për mediat në Kosovë se ka një dosje ku vajza është e identifikuar si viktimë e trafikimit.
“Para 3-4 muajve më duket, nuk i kam informacionet e plota. Mirëpo po. Në zyrë te unë është e identifikuar si viktimë”, ka thënë Hasanaj.
Pra, sipas këtyre fakteve 11-vjeçarja edhe pse nën mbikëqyrjen e organeve shtetërore u përdhunua nga 5 persona në një park. Ngjarja e rëndë ka ndodhur në Dragodan të Prishtinës më 27 gusht, ku 5 burra, mes tyre 3 të mitur, kanë dhunuar e përdhunuar 11-vjeçaren për 7 orë në një nga parqet e kryeqytetit. Fillimisht janë arrestuar 4 nga 5 autorët e dyshuar të ngjarjes ndërkohë që i pesti u dorëzua në polici pas 3 ditësh.
Discussion about this post