Detaje të reja janë zbardhur për grabitjen e ndodhur një ditë më parë në një bankë në qendër të Athinës. Deri tani hetuesit nuk kanë mundur të identifikojnë dy grabitësit për shkak se këta të fundit ishin të maskuar.
Megjithatë policia ka mundur të zbardhë çdo lëvizje të tyre. Referuar pamjeve mësohet se grabitësit ishin të maskuar dhe në momentin që kanë hyrë brenda kërcënuan personelin me armë zjarri tip kallashnikov. Ata grabitën nga banka 11 mijë euro dhe për t’u larguar, përdorën një grua si “mburojë”.
Referuar pamjeve, mësohet se ata kanë mbuluar fytyrën me maskë anti-COVID dhe janë veshur thjeshtë. Kujtojmë se grabitja, e ngjashme me ato të filmave, ka ndodhur rreth orës 11:35 sipas asaj lokale në qendër të Athinës.
Dy autorët hynë në bankë, nxorën kallashnikovët dhe terrorizuan punonjësit dhe klientët. Burime për median greke, protothema, bëjnë me dije se 10 persona janë shoqëruar për në komisariat, por nuk dihet nëse ata kanë lidhje apo dijeni për grabitjen.
