Mbi 12 mijë persona në të gjithë Botën ranë në kurthin e FBI-së, pasi përdornin telefonat ANOM, që konsideroheshin pajisje të papërgjueshme, dhe që shërbenin kështu si ndërlidhese mes grupeve apo bandave kriminale. Dhe ndoshta në rrjetën e FBI kanë rënë edhe personazhe shqiptare, të përfshirë në botën e krimit.
Prej vitit 2018, telefonat Anom nisën të përdoren nga rreth 300 organizata kriminale, kryesisht anëtarë të organizatave mafioze apo grupe të përfshira në trafikun ndërkombëtar të drogës.
Përdorimi i këtyre pajisjeve, të sponsorizuara nga FBI, u pa si një rrugëzgjidhje në një komunikim të papërgjueshëm, pas mbylljes së shërbimit të enkriptuar telefonik Encrochat dhe platformës Sky.
Por, ajo që nuk dihej ishte se çdo mesazh apo bisedë përmes ANOM ruhej në serverat e FBI dhe shërbimeve sekrete australiane, që monitoronin në distancë atë që ndodhte mes grupeve kriminale në mbarë Botën.
Suedezi 40 vjeçar Maximilian Rivkin u përfshi në shitjen e të tillë telefonave dhe më pas u kthye në administratorin e kompanisë. Departamenti amerikan i shtetit disa dite më parë ofroi 5 milion dollarë për çdo informacion që do të çonte në arrestimin e tij.
Rivkin është shpallur në kërkim prej vitit 2021 kur FBI dhe Europoli arrestuan persona që administronin, përdornin, shisnin telefona të enkriptuar Anom.
Operacioni Trojan Shield i vënë në veprim nga FBI duke inkurajuar përdorimin e telefonave Anom, u bë i mundur nga bashkëpunimi me një të dënuar amerikan në këmbim të uljes së dënimit.
Discussion about this post