Përfshihet nga flakët banesa në Vlorë, humb jetën një person

Një banesë private në qendër të qytetit të Vlorës është përfshirë nga flakët mesditën e sotme.

Raportohet se si pasojë e flakëve që përfshinë shtëpinë ka humbur jetën një person, i cili ishte i paralizuar.

Policia dhe shërbimet zjarrfikëse ndodhen në vendngjarje, ndërsa po punohet për shuarjen e zjarrit.

“Morëm njoftim se në këtë banesë ka zjarr. Është një banesë e vjetër. Kur mbërritën forcat zjarrfikëse zjarri kishte marrë përmasa të mëdha dhe mbi çati. Fikëm zjarrin u futëm brenda dhe konstatuam se një person ka ndërruar jetë pasi është ndodhur në mes të vatrës së zjarrit në momentin kur është përhapur zjarri. Dyshohet se ka qenë moshë e madhe. Shkak do të ketë qenë përdorimi i një ngrohëses apo ndonjë shkëndije elektrike”, u shpreh një zjarrfikës.

Edhe policia ka dhënë informacion paraprak mbi ngjarjen.

“Rreth orës 11:35, në lagjen ‘Osman Haxhiu’, dyshohet se aksidentalisht ka rënë zjarr në banesën e një të moshuari, rreth 70 vjeç, (tetraplegjik), i cili për shkak të dëmtimeve të shkaktuara nga flakët, ka humbur jetën, brenda në banesë.

Grupi hetimor po punon për përcaktimin e shkakut të rënies së zjarrit”, thuhet në njoftimin e policisë.