Një furrë buke është përfshirë nga flakët në lagjen “Dëshmorët e Kombit” në Berat. Sipas informacioneve paraprake dyshohet se zjarri të jetë shkaktuar nga një qark i shkurtër elektrik.
Zjarri është parë nga punëtorët në një nga dhomat e pjekjes dhe më pas zjarri është përhapur me shpejtësi në të gjithë furrën. Punonjësit dhe pronari i furrës, i cili banon sipër saj, kanë njoftuar menjëherë Repartin e Shpëtimit nga zjarri, të tmerruar nga përhapja e shpejtë e flakëve.
Forcat zjarrfikëse kanë mbërritur në vendin e zjarrit, por edhe pse kanë mundur të lokalizojnë shpejt flakët dhe të shuajnë në kohë zjarrin, pjesa me e madhe e furrës është shkrumbuar.
Fatmirësisht nga zjarri nuk ka pasur të lënduar, pasi punëtorët kanë dalë shpejt. Zjarrfikësit në vendngjarje janë duke punuar edhe për të zbuluar shkaqet e zjarrit që mori përmasa të mëdha, edhe pse paraprakisht mendohet të jetë shkaktuar nga një qark i shkurtër elektrik.
Discussion about this post