Kryetari i Sindikatës së Futbollistëve Shqiptarë, Andi Lila ka reaguar mbi skandalin e përfshirjes së politikës në zgjedhjet e FSHF dhe tritolit në shtëpinë e Armand Dukës.
Përmes një postimi në Facebook, Lila shprehet se është i indinjuar nga kjo ngjarje, ndërsa shton se Duka ka mbështetjen e Sindikatës së Futbollit shqiptar.
“Shumë i tronditur dhe i indinjuar me sulmin me tritol në shtëpinë e Presidentit të FSHF-së, Armand Duka. Në këtë moment të vështirë për familjen Duka, unë dhe Sindikata e Futbollistëve Profesionistë dua t’i shprehim të gjithë mbështetjen tonë dhe të urojmë që ta kalojë sa më shpejt këtë traumë të rëndë. Në kulmin e një konflikti të ngarkuar politikisht, që po shkon përtej çdo limiti, vjen edhe ky incident i rëndë. Për fat të mirë nuk pati viktima në njerëz, por kjo ngjarje ka goditur rëndë psikologjikisht komunitetin e futbollit shqiptar”, shkruan futbollisti.
Lila shprehet se komuniteti i futbollit ndodhet nën trysni nga politika, e cila sipas tij po përpiqet të manipulojë zgjedhjet në FSHF dhe që rrezikon të dëmtojë vendin për finalen e UEFA Conference League.
“Ky komunitet ndodhet në një trysni të tmerrshme me presione nga më të ulëta që vijnë nga eksponentë politikë në të gjithë vendin. Dhe e gjitha kjo bëhet për të manipuluar procesin e zgjedhjeve në Shoqatat Rajonale të Futbollit me qëllimin final për të ndryshuar vullnetin e zgjedhësve në Asamblenë e Përgjithshme të FSHF-së. Një sulm i paprecedentë që duhet ndalur sa më parë pasi rrezikon ta dëmtojë rëndë Shqipërinë dhe organizimin e finales së UEFA Conference League në Tiranë më 25 Maj”, shkruan ndër të tjera Lila.
Ish-futbollisti i kombëtares i bën thirrje të gjithë aktorëve politikë që të tërhiqen nga këto veprime të papërgjegjshme për të ndërhyrë në mënyrë flagrante në çështje që i takojnë komunitetit të futbollit.
Discussion about this post