Kryeministri Edi Rama ishte i pranishëm në mbledhjen e asamblesë së Partisë Socialiste në Vlorë. Ai zgjodhi që të dilte më herët nga mbledhja e cila filloi në orën 12:00. Përballë gazetarëve kreu i qeverisë tha se dhe pse ka zgjedhur që të jetë deputet në Durrës, do të jetë i pranishëm në Vlorë.
‘Unë kam zgjedhur që të jem deputet i Durrësit, për ti kushtuar një vëmendje të veçantë, por unë do të vazhdoj të jem në Vlorë, për të bërë dhe më shumë, sepse me Vlorën nuk më ka lidhur mandati i deputetit, dhe nuk më ndan ndarja e mandateve.Është shumë e rëndësishme që ne të vazhdojmë punën në Vlorë, këtu kemi shumë sfida që kanë të bëjnë dhe me adminsitrimin e vogël, unë jam i shqetësuar për bashkitë që kanë detyrime ekstra, dhe kanë lidhje me industrinë e turizmit.
I pyetur për ngjarjen që tronditi mbrëmjen e së shtunës, Velipojën ku mbetën të vrarë katër persona dhe dy të tjerë u plagosën, pas një konflikti për shezlonget, kryeministri nuk dha një koment të drejtpërdrejtë, por u shpreh i shqetësuar për bashkitë që kanë detyrime ekstra dhe që janë të lidhura me indrustrinë e turizmit.
Rama po ashtu u shpreh se nuk ka kohë për të humbur dhe se ka thirrur në takim Ministrin e Brendshëm dhe disa nga drejtuesit kryesorë të policisë për një fazë të re ristrukturimi.
“Sa i përket administrimit të vogël, unë jam i shqetësuar jo vetëm për Vlorën, por për Bashkitë që kanë detyrime ekstra dhe që janë të lidha me industrinë e turizmit. Dhe për këto kemi folur. Kam thirrur Ministrin e Brendshëm dhe disa drejtuesit kryesorë të policisë, për të mos humbur kohë dhe për të lancuar sa më shpejt një fazë të re të ristrukturimit që është përgatitur dhe që për arsye të mirëkuptueshme është momenti që të përshpejtohet me disa javë, dhe të mos presim fundin e verës”, tha Rama.
