Mbyllet seanca e dytë gjyqësore në Hagë ndaj ish-krerëve të UÇK-së. Kryetari i trupit gjykues, Charles Smith, tha se seanca tjetër do të mbahet nesër në orën 09:00, në të cilën avokati mbrojtës i Jakup Krasniqit do të prezantojë deklaratën para trupës gjykuese.
“Këtu mbyllet seanca e sotme publike. Do të rimblidhemi nesër në orën 09:00 për të vijuar me deklaratën hyrëse të Mbrojtjes së z. Krasniqi”, tha kryegjykatësi.
Të hënën nisi gjykimi ndaj Hashim Thaçit, Kadri Veselit, Rexhep Selimit e Jakup Krasniqit, me deklaratën hyrëse të Prokurorisë. Sot fjalën mbrojtëse e dhanë para gjyqit avokatët e Thaçit, Veselit e Selimit. Thaçi dhe Selimi zgjodhën që t’i thonin disa fjalë edhe vetë.
Avokati i Thaçit: UÇK ka luftuar për atdheun
Sot, në ditën e dytë të gjyqit, mbrojtja e ish-presidentit Hashim Thaçi ka nisur deklaratat hyrëse për rastin e ngritur nga Zyra e Prokurorit të Specializuar. Avokati mbrojtës i ish-presidentit Hashim Thaçi, Gregory Kehoe, nisi deklaratën e tij duke thënë se Ushtria Çlirimtare e Kosovës ka luftuar për atdheun dhe ekzistencën e tyre.
Kehoe tha se i vetmi rrezik në atë kohë ka qenë policia jugosllave.
“UÇK ka luftuar për ekzistencën e tyre dhe për atdheun. I vetmi rrezik ekzistencial ishte policia ushtarake jugosllave”, tha ai.
Prokuroria tha një ditë më parë se katër të akuzuarit kishin themeluar një “ndërmarrje të përbashkët kriminale” që gjatë periudhës së luftës kishte shënjestruar personat që i ka konsideruar kundërshtarë të UÇK-së. Në ditën e parë të gjyqit u shfaqën prova të prokurorisë në formë të komunikatave të UÇK-së, intervistave televizive, dokumentarëve e shënimeve personale të disa prej të akuzuarve.
Fjala e Thaçit
Ish-presidenti i Kosovës, Hashim Thaçi, shprehu keqardhje për të gjitha viktimat gjatë konfliktit më 1998-99. Ai iu drejtua Dhomave të Specializuara në Hagë në ditën e dytë të gjykimit ndaj tij dhe tre ish-eprorëve të tjerë të UÇK-së, të akuzuar për krime lufte dhe krime kundër njerëzimit.
“Ndjej keqardhje dhe dhimbje për të gjitha viktimat e kësaj lifte pavarësisht nga përkatësia etnike, fetare, apo politike”, tha Thaçi. Thaçi hodhi të gjitha akuzat që ia ngarkon Zyra e Prokurorit të Specializuar.
“Unë jam i pafajshëm për të gjitha këto akuza. Por, jam gati të përballen me këtë sfidë të re dhe të kem sukses për familjen time, popullin tim”, tha Thaçi. Ai tha se ky gjykim është “rrugëtim drejt të vërtetës dhe drejtësisë”.
Sipas Thaçit, viktimat nuk marrin drejtësi përmes përndjekjes të të “pafajshmëve”. “Padrejtësia nuk ndreqet me një padrejtësi tjetër”, tha Thaçi. Ai foli edhe për synimin e luftës së zhvilluar më 1998-99.
“Si rezistenca paqësore ashtu edhe ajo e armatosur kishin të njëjtin synim: lirinë, shtetësinë dhe rendin demokratik të Kosovë”.
E DHIMBSHME, Jakup Krasniqi qan në Hagë
Ish-zëdhënësi i Ushtrisë Çlirimtare të Kosovës njëherësh edhe njëri nga i akuzuarit nga Gjykata Speciale në Hagë, Jakup Krasniqi, është parë duke qarë në seancën e sotme gjyqësore.
Në seancën e sotme, Krasniqi u pa fort i emocionuar e me lot në sy teksa Gregory Keohe, avokati i ish-presidentit, Hashim Thaçi, po fliste për krimet serbe të kryera gjatë luftës në Kosovë.
Po ashtu, avokati i Hashim Thaçit ka publikuar pamje të ndryshme të masakrave dhe bombardimeve të NATO-s, të cilat gjithashtu e kanë emocionuar Krasniqin.
Discussion about this post