Arben Ahmetaj u paraqit sot në zyrat e SPAK i shoqëruar nga dy avokatët e tij, Ardian Visha dhe Henrik Ligori, ndërsa për më shumë se 5 orë ka dëshmuar, lidhur me çështjen e inceneratorit të Elbasanit.
Kjo ishte hera e parë që Ahmetaj përballej me prokurorët e SPAK, ndërsa për të njëjtën çështje sot ndodhen në burg ish-ministri Lefter Koka dhe ish-deputeti socialist, Alqi Bllako.
Pas daljes nga SPAK, Ahmetaj u shpreh se ka sqaruar pozicionin e tij, ndërsa ka shmangur përgjigjet ndaj pyetjeve që iu drejtuan nga gazetarët.
“Do të paraqitem sa herë që të më thërrasin”, u shpreh Ahmetaj.
Ahmetaj po hetohet nga SPAK për shpërdorim detyre, korrupsion, pastrim parash dhe përfitime të paligjshme, ndërsa hetimi ndaj tij është nisur si pasojë e bashkimit të dy procedimeve penale, një nga të cilët është procedim i ndarë nga hetimi i SPAK për çështjen e inceneratorit të Elbasanit. Dosja me 21 persona të akuzuar ka shkuar tashmë për gjykim.
Por më parë është veçuar një fraksion i saj, ku bëhet fjalë pikërisht për procedurën e ndjekur nga Ahmetaj për dërgimin për miratim në Këshillin e Ministrave të projektit të ndërtimit të inceneratorit dhe dakordësinë e Ministrisë së Financave për ta ndërtuar përmes negocimit pa shpallje.
SPAK ka nisur verifikimin pasuror ndaj Ahmetajt, ndërsa Byroja Kombëtare e Hetimit kreu kontrolle më 9 Mars në shtëpitë e ish-gruas Albina Mancka dhe bashkëjtueses aktuale Erjola Hoxha. Kontrollet u zhvilluan pas urdhrit të dhënë nga Gjykata e Posaçme.
Prokurorët që kanë marrë në dorë hetimin ndaj ish-zv.kryeministrit janë Altin Dumani dhe Enkelejda Millonai.
Nuk dihet nëse prokurorët e SPAK do e shikojnë më të arsyeshme të thërrasin Ahmetajn për të dhënë dëshmitë e tij apo sqaruar pozicionin, sikundër nuk dihet nëse SPAK do të çojë më tej procedurat ndaj ish-zv.Kryeministrit.
Discussion about this post