Ka përfunduar procesi i regjistrimit në Maqedoninë e Veriut, ku kreu i Shërbimit Statistikor Kombëtar të Maqedonisë Veriore, Apostol Simovski deklaroi se 1,832,696 banorë janë regjistruar si banorë në vend, ndërsa 204,805 të tjerë janë “shënuar” si diasporë.
Simovski tha se regjistrimi i popullsisë ishte një sukses i plotë, duke vënë në dukje se numri i personave që refuzuan të bashkëpunonin për nevojat e regjistrimit ishte i ulët.
“Regjistrimi u krye me sukses absolut. Vendi ka vërtetuar se ka aftësinë për të kryer një operacion kaq të vështirë statistikor. Regjistruesit vizituan të gjitha shtëpitë, pothuajse të gjithë qytetarët morën pjesë në proces,“– shtoi ai.
Mediet fqinje shkruajnë se rezultatet përfundimtare të regjistrimit të popullsisë pritet të shpallen deri në mars 2022, ndërkohë që ende nuk ka një rezultat të saktë lidhur me numrin e shqiptarëve që kanë kryer procedurat.
