Data 31 gusht ishte afati i fundit për evakuimet e SHBA-së, i cili përfundoi dje ku gjithsej raportohet se mbi 122,000 njerëz janë evakuuar nga Kabuli. Pas dy dekadash, ushtari i fundit i amerikan u largua pa zhurmë e pa ceremoni nga Afganistani. Pikërisht në orën 11.59 pasdite me kohën e Kabulit, avioni i fundit amerikan u ngrit nga toka afgane. Gjeneral Major, Chris Donahue, u dërgoi një mesazh trupave të tij: ”Punë e mirë, jam krenar për të gjithë ju“.
Pas largimit të trupave amerikane, talebanët nuk vonuarn të merrnin nën kontroll aeroportin e Kabulit, të vetmin vend që ishte në kontroll të forcave të huaja. Zëdhënësi i talebanëve, Zabihullah Mujahid falenderoi ushtarët talebanë për përpjekjet e tyre duke i përgëzuar për “fitimin e pavarësisë”.
“Ne jemi krenarë për sakrificat tuaja. Kjo është për shkak të vështirësive që pësuat ju dhe udhëheqësit tanë. Është për shkak të ndershmërisë dhe durimit që ne jemi të pavarur sot,” tha ai.
Ai gjithashtu u bëri thirrje luftëtarëve talebanë që të “jenë të butë” me popullin afgan.
“Unë gjithashtu do të doja t’ju kërkoja që të jeni të kujdesshëm në mënyrën se si silleni me njerëzit tuaj. Ky komb ka vuajtur shumë. Populli afgan duhet të trajtohet me dashuri dhe simpati. Pra, jini të butë me ta. Ne jemi shërbëtorët e tyre. Ne nuk u jemi imponuar atyre“, -shtoi ai.
Ushtria amerikane u sigurua që të çaktivizonte avionët dhe automjetet e tyre të armatosura të lëna pas në Aeroportin e Kabulit para se të largoheshin të hënën në mbrëmje.
Ky është një mision që nisi pas sulmeve terroriste të 11 Shtatorit të 2001 dhe solli Osama bin Ladenin para drejtësisë së bashku me shumë prej komplotistëve të tij në Al Kaeda. Çmimi ishte 2,461 pjesëtarë të ushtrisë amerikane dhe civilë të cilët u vranë dhe më shumë se 20,000 u plagosën. Fatkeqësisht, kjo përfshin 13 anëtarë të ushtrisë amerikane të cilët u vranë nga një sulm kamikaz i ndërmmarë nga ISIS-K javën e kaluar.
