Ministrja e Bujqësisë ka qenë në qendër të vëmendjes muajt e fundit për shkak të numrit të lartë të tenderëve problematik që zhvillon. Edhe ky i fundit nuk është më pak abuziv, përkundrazi tregon edhe njëherë se ministrat tanë parapëlqejnë bashkëpunimet me biznesmenët e përfshirë në skandale. Është publikuar në Agjencinë e Prokurimeve Publike një tender me objekt “Mbrojtje nga përmbytja nga lumi Devoll në Gegë, Bashkia Kuçovë”, për të cilin qytetarët shqiptarë do të paguajnë 58 milionë lekë. Nëse punimet për minimizimin e përmbytjeve do të ndiqnin rregullat sipas ligjit, ky projekt më në fund do të ishte një shpenzim që ja vlente, por të dhënat e deritanishme tregojnë që nuk është gjë tjetër veç se dhurata e radhës për miqtë e ministres.
Në dokumentet e tenderit bie në sy se, fituesi i këtij projekti është operatori “Vëllezërit Hysa”, shumë të njohur për mashtrimet me tenderët. Administratorët e saj, Agron dhe Kujtim Hysa, u arrestuan në fillim të vitit 2018, pasi Prokuroria e Elbasanit zbuloi se kompania nuk kishin kryer punime në aksin rrugor “Elbasan-Gjinar”, për të cilën ishte angazhuar si nënkontraktor. Pra mashtruan dhe përfitua fondin për tenderin në fjalë. Megjithatë, Agron dhe Kujtim Hysa fituan shpejt lirinë, pasi gjykata rrëzoi më vonë masën e sigurisë “arrest me burg” ndaj tyre, ndërkohë që, më pas u përballen në proces gjyqësor për akuzat e “vjedhjes duke shpërdoruar detyrën”.
Por, pavarësisht këtij skandali “Vëllezërit Hysa” renditet si një nga kompanitë që kanë përfituar më shumë tenderë gjatë qeverisjes së “Rilindjes”. Vetëm në katër vitet e para të qeverisë “Rama” kjo kompanirezulton se është shpallur fitues në mbi 100 tenderë pa garë, me vlerë totale rreth 38 miliardë lekë. Një pjesë të konsiderueshme të fondeve publike, kompania i ka marrë në tenderët e organizuar nga Fondi Shqiptar i Zhvillimit dhe Autoriteti Rrugor Shqiptar.
Në shumë prej këtyre tenderëve, “Vëllezërit Hysa” janë kapur sërish në shkelje me skemën e tyre mashtruese, duke u regjistruar si kontraktor në një projekt por që nuk kryejnë shërbimin që detyrohen. Përmendim këtu një rast të denoncuar nga Kontrolli i Lartë i Shtetit, ku në vitin 2018 konstatoi se “Vëllezërit Hysa” duhet t’i kthej mbrapsht mbi disa qindra milionë lekë Bashkisë së Belshit, pasi nuk kishte kryer punimet e kërkuara.
Pra, në çdo tender kjo kompani përdor metodën duke marrë paratë dhe më pas nuk kryen shërbimet. Në këto kushte le të kuptohet se e njëjta skemë do të ndodh edhe për tenderin që ka hapur së fundmi Krifca. Vëllezërit Hysa do marrin paratë dhe fshati Gegë në Kuçovë do të rrezikohet sërish nga përmbytjet. Gjithsesi mbetet për t’u parë, aq sa mbetet enigmë fakti që Krifca vazhdon të lidh tenderë me oligarkë dhe askush nuk reagon.
Discussion about this post