Konklava e 7 Majit për zgjedhjen e pasardhësit të Papa Françeskut nuk do të zgjasë shumë, siç thotë kardinali i Bagdadit Luis Rafael Sako, i cili parashikon një proces zgjedhor 2 deri 3-ditor.
Ky opinion dominon mes kardinalëve pjesëmarrës në konklavë dhe këtë e kanë shprehur edhe para mediave, teksa tashmë mbetet 1 javë nga nisja e procesit zgjedhor kur ata mbyllen në kishën e njohur botërisht si “Kapela Sistine”, pa asnjë kontakt me botën jashtë deri kur të zgjidhet Papa.
Në këtë linjë është edhe kardinali tjetër frannko-algjerian Zhan Pol Vesko, i cili në një intervistë për të përditshmen italiane La Repubblica shpreh bindjen se konsensusi për Papën e ri do të gjendet shumë shpejt.
“Jam i vetëdijshëm që s’do kemi një Françesk. Besoj se do gjendet konsensusi. Françesku e lëkundi shumë kishën dhe tani ky institucion ka nevojë për paqe. Cilido që zgjidhet duhet të përmbushë kriterin e unitetit dhe të udhëheqë popullin e Zotit që dëshiron të ecë në drejtimin e Françeskut”.
Konsensusin më të gjerë për momentin e gëzon Sekretari aktual i Shtetit të Vatikanit, Pietro Parolin, i cili mund t’ua rikthejë pontifikatin italianëve pas më shumë se gjysmë shekulli.
Discussion about this post