1 person humbi jetën dhe një tjetër u plagos rëndë, pas përplasjes së dy automjeteve në aksin rrugor Lezhë-Shkodër.
Aksidenti ndodhi rreth orës 6:00 të mëngjesit të së martës në afërsi të kryqëzimit të Dajçit dhe sipas policisë automjeti me drejtues shtetasin Zyhdi Meti, është përplasur me automjetin me drejtues Vilson Tola.
Nga aksidenti gjeti vdekjen e menjëhershme Zyhdi Meti. Ndërsa, drejtuesi i automjetit tjetër Vilson Tola ka marrë dëmtime serioze dhe është dërguar në spitalin e Traumës në Tiranë për mjekim më të specializuar.
Shkak i aksidentit fatal mendohet se është parakalimi i gabuar i mjetit me drejtues shtetasin Vilson Tola, duke sjellë edhe përplasjen e fortë.
Si pasojë e aksidentit, për një periudhë të gjatë kohore është bllokuar edhe ky aks rrugor, duke shkaktuar trafik të automjeteve.
Edhe pse në një hark kohor të shkurtër, në këtë superstradë janë shkaktuar 3 aksidente me pasojë vdekjen e personave, deri më tani akoma nuk është marrë asnjë masë nga ana e policisë apo edhe autoritetit rrugor.
