Rusia ua ka ndaluar hyrjen ministrit të Jashtëm të Malit të Zi, Ranko Krivokapiq, atij të Brendshëm, Rashko Konjeviq dhe ish-drejtorit të Agjencisë Kombëtare të Sigurisë, Savo Kentera.
“Kjo masë është në përgjigje të një tjetër vendimi armiqësor të palës së Malit të Zi në shtator të këtij viti, kur shpalli ‘non grata’ diplomatë të Ambasadës ruse në Podgoricë”, u tha në njoftimin e Ministrisë së Jashtme ruse.
Në fund të shtatorit, në një aksion Agjencisë Kombëtare të Sigurisë së Malit të Zi dhe Zyrës së Prokurorisë Speciale , u zbulua një rrjet i agjentëve rusë të inteligjencës që vepronin në Malin e Zi.
Gjashtë diplomatë rusë u dëbuan dhe 28 shtetasve të huaj iu ndalua hyrja në Mal të Zi.
Me kërkesë të Prokurorisë Speciale të Shtetit dhe me urdhër të Gjykatës së Lartë në Podgoricë, policia po kontrollon banesat dhe hapësirat e tjera të disa qytetarëve.
Siç deklaruan autoritetet, vendimi për dënim nga Mali i Zi u mor për shkak të aktiviteteve që ishin në “kundërshtim me Konventën e Vjenës për Marrëdhënie Diplomatike”.
Raportet diplomatike midis Malit të Zi dhe Rusisë janë përkeqësuar që nga viti 2014, kur Podgorica mbështeti sanksionet e Bashkimit Evropian ndaj Rusisë për shkak të aneksimit të paligjshëm të Gadishullit ukrainas të Krimesë.
Mali i Zi iu bashkua sanksioneve perëndimore ndaj Moskës, pasi kjo e fundit nisi pushtimin e paprovokuar të Ukrainës më 24 shkurt. Pas kësaj, Rusia e futi Malin e Zi në listën e “shteteve armiqësore”./REL
Discussion about this post