Detaje të reja kanë dalë në lidhje me përgjimet që çuan pas hekurave Klodian Kapedanin nga Kavaja, i cili akuzohet se bleu vota për koalicionin “Bashkë Fitojmë” në zgjedhjet lokale të 14 majit.
Kapedani u arrestua dje me urdhër të SPAK, pasi ditën e zgjedhjeve të 14 majit iu ka premtuar dhe iu ka ofruar personave para me qëllim që të marrin pjesë në votime dhe për të blerë votat.
Për rrjedhojë Kapedani akuzohet për veprën penale “Korrupsioni aktiv në zgjedhje”.
Burime bëjnë me dije se për 39-vjeçarin nga Kavaja nuk ka pasur asnjë kallëzim nga qytetarët apo subjekte të ndryshme politike, por korrupsioni zgjedhor është zbuluar rastësisht gjatë përgjimeve telefonike të disa personave të tjerë, të cilët janë në hetim nga SPAK për vepra të tjera panale, por që nuk kanë lidhje me korrupsion zgjedhjesh.
Edhe Policia e Tiranës ka dhënë njoftimin për arrestimin e Kapedanit.
Njoftimi i Policisë:
Specialistët e Seksionit për Hetimin e Korrupsionit ekzekutuan vendimin penal të Gjykatës së Shkallës së Parë për Korrupsionin dhe Krimin e Organizuar për shtetasin K. K., 39 vjeç, banues në Kavajë, pasi dyshohet se është subjekt i veprës penale, “Korrupsioni aktiv në zgjedhje”.
Discussion about this post