Përgjysmohen gjyqtarët, në nivel apeli. Shkak është bërë dorëheqja dhe shkarkimi nga detyra, kryesisht për pasuri të paligjshme dhe lidhje me krimi.
Burime për gijotina.com bëjnë me dije se nga 78 gjyqtarë të përcaktuar në organikën e gjashtë gjykatave të apelit, deri në fund të vitit 2020 kanë ushtruar detyrën vetëm 40 gjyqtarë.
Zgjatja e afatit për shqyrtimin e një çështje civile dhe penale është reflektuar edhe në progres-raportin e fundit të Komisionit Evropian për Shqipërinë. Në raport thuhet se për të shqyrtuar një çështje në Apel duhen mesatarisht rreth 5 vite.
“Gjykatat e Apelit kanë një numër të madh të çështjeve të trashëguara dhe vende të lira gjyqësore, me vetëm 40 gjyqtarë apeli në detyrë nga 78. Një hartë e re gjyqësore duhet të miratohet dhe zbatohen urgjentisht për rishpërndarjen e gjyqtarëve dhe burimeve brenda gjyqësorit. Kohëzgjatja mesatare për një çështje në nivelin e apelit është 998 ditë për çështjet penale dhe 1742 ditë për çështjet civile. Gjykatat me ngarkesën më të madhe janë Gjykata e Lartë dhe Gjykata Administrative e Apelit. Gjykata e Apelit 15 178 çështje nga të cilat 7463 janë depozituar më shumë se sa dy vite. Gjykata e Lartë ka numrin më të lartë të grumbullimit të çështjeve, 36 288 çështje, nga të cilat 27 843 janë depozituar më shumë se sa dy vite”, thuhet në raport.
Dy janë arsyet se pse vakancat në Apel nuk po plotësohen. Së pari, për disa vende vakante në gjykatat e apelit në rrethe, nuk ka aplikuar askush, çka ka sjellë rihapjen e procedurave në mënyrë të përsëritur.
Pra askush nuk ka shprehur interesin për të punuar si gjyqtar në Apelin e rretheve. Së dyti, kandidatët që kanë aplikuar për Apelin në Tiranë, nuk kanë përfunduar ende procesin e Vettingut.
