“Grupi për PD” ka dalë me një deklaratë zyrtare ditën e sotme ku kërkon dorëheqjen e Lulzim Bashës nga posti i kryetarit të PD. Ata e kanë konsideruar antistatutor vendimin e Bashës për largimin e ish-liderit historik Sali Berishës nga grupi parlamentar i PD.
“’Grupi për PD’ ka ndjekur me shqetësim zhvillimet e ditëve të fundit në Partinë Demokratike. Vendimi i fundit i Kryetarit në detyrë të Partisë Demokratike është antistatutor dhe në vazhdën e të gjitha vendimeve antistatutore e antidemokratike të ndërmarra që prej vitit 2017”.
“Grupi për PD”, ia atribuojnë Bashës humbjen në zgjedhjet e 25 prillit duke e akuzuar se ka bërë marrëveshje me kryeministrin Edi Rama për përfitimet e tij personale.
“Lulzim Basha është përgjegjës për humbjen e zgjedhjeve të 25 prillit 2021 nëpërmjet pazareve dhe marrëveshjeve fitimprurëse me Edi Ramën, për përfitim personal. “Masakra zgjedhore” ishte alibia e radhës për të mbuluar këto pazare”.
Ata kërkojnë sërish reformimin e PD, që kjo e fundit t’i rikthehet demokratëve dhe të jetë anëtarësia që të vendosë mbi të ardhmen e saj.
“Për këto arsye dhe shumë të tjera, Partia Demokratike duhet të ri ngrihet dhe reformohet si një parti e djathtë bashkëkohore, me një projekt të ri të bazuar në idealet e themelimit të saj. PD-ja e marrë peng duhet ti kthehet demokratëve dhe anëtarësia e saj e gjerë dhe e pandikuar, e pakushtëzuar, duhet të vendosë mbi të ardhmen e saj. Dorëheqja ose largimi i Lulzim Bashës nga pozitat e Kryetarit në detyrë duhet të jetë akti i parë dhe i menjëhershëm drejt këtij reformimi”.
Ndër të tjera, ata shprehen se Shqipëria ka nevojë për një opozitë të fortë dhe kjo bëhet vetëm më hapjen e partisë.
“Reformimi i PD-së do të vijë nga bashkimi i të gjithë kontributeve dhe vlerave ndër vite, konkurrenca e lirë dhe meritokracia në Parti. Ne vlerësojmë se Shqipëria ka më tepër se kurrë nevojë për një opozitë të fortë, të pa kapur dhe të pandikuar dhe kjo bëhet vetëm me hapjen e Partisë dhe kthimin e institucionit të votës së lirë”, shkruhet në deklaratë.
Ditën e djeshme, anëtarësia e Forumit Rinor të Partisë Demokratike kërkoi një referendum për përjashtimin e Berishës nga grupi parlamentar i partisë, një ditë para se ish-kryeministri të nisë turin e takimeve në bazë.
