Kryeministri Edi Rama nuk ka komentuar vendimin e kreut të demokratëve, Lulzim Bashës për të përjashtuar nga grupi parlamentar ish-kryeministrin Sali Berisha.
Rama ka injoruar zhvillimet në PD, teksa ka publikuar punimet në kantieret e Rindërtimit në Laç dhe Thumanë.
“MIRËMËNGJES dhe me këtë fotoalbum të punës transformuese në kantieret e Rindërtimit që besoj se flet vetë, ju uroj një ditë të mbarë. Laç dhe Thumanë”, shkruan Rama në Facebook.
Nuk dihet nëse gjatë fjalimit që pritet të japë në Kuvend për nisen e sezonit të ri Parlamentar, Rama do ta cekë si temë, por mund të themi me siguri se ky është debati që ka pushtuar mediat sociale dhe ekranet e TV.
Mbrëmjen e djeshme, Lulzim Basha njoftoi se ka vendosur përjashtimin nga grupi parlamentar të ish-kryeministrit Sali Berisha. Vendimi sipas Bashës është personal dhe nuk e hodhi në votim, pasi nuk donte përçarje në parti.
Berisha pas këtij veprimi të Bashës ka deklaruar se nuk do të krijoj një grup të ri, por do të vazhdoj betejën për të rikthyer sovranitetin e PD. Madje, në daljen e tij për media, ai ka artikuluar dhe dorëheqjen e liderit të sotëm të opozitës, duke u shprehur se duhet të kishte dhënë dorëheqjen pesë herë para se të vriste sovranitetin e PD.
