Ish-deputeti Ervin Salianji, i ftuar në emisionin Studio24, ka folur për situatën brenda Partisë Demokratike, pasi nuk u lejua të garojë për kreun e partisë përballë Sali Berisha. Ai u ndal edhe te kandidimi i Mereme Selës, e cila më pas u përjashtua nga gara.
Salianji deklaroi se është i vetmi kandidat që ka paraqitur një platformë konkrete për drejtimin e PD-së, duke përfshirë çështje që lidhen me raportin ndaj SPAK, marrëdhëniet me Shtetet e Bashkuara të Amerikës, organizimin e degëve të partisë dhe përzgjedhjen e kandidatëve për deputetë.
“Jam i vetmi që kam depozituar platformë, nga mënyra e qasjes ndaj SPAK-ut, te marrëdhënia me SHBA-në, rienergjizimi i degëve të PD-së, buxheti, pajtueshmëria e mandatit të kryetarit të degës dhe ndarja e listave të kandidatëve për deputetë. E kam dorëzuar dhe anëtarësia e di. Edhe në takimin e Dibrës e kam përmendur. Kandidati tjetër nuk ka platformë fare”, tha ai.
Ai u ndal edhe te procesi i përzgjedhjes së kandidatëve për deputetë, duke pretenduar se meritokracia është rrëzuar dhe se janë përjashtuar figurat më të votuara në primare.\
Ai u ndal edhe te largimi nga lëvizja e nisur prej tij i figurave si Ilir Alimehmeti dhe Aulon Kalaja.
Salianji deklaroi se pakënaqësia ndaj drejtimit të Berishës brenda PD-së është shumë më e madhe sesa duket publikisht.
“Nuk e kam çuar në gjykatë sepse kam dashur të ketë një zgjidhje politike. Unë po kërkoj që PD të jetë fituese. Ndërkohë ai thotë: ‘Pse e do fituese, se je mirë me Ramën’”, deklaroi ish-deputeti.
Duke komentuar largimin e figurave të njohura nga lëvizja e nisur prej tij, Salianji tha se nuk e di se kë do të mbështesin Ilir Alimehmeti dhe Aulon Kalaja në garën e brendshme të PD-së.
“Unë nuk e di kë do votonin Alimehmeti dhe Kalaja. Kur Edi Rama doli kundër Fatos Nanos, kë kishte në krah? Askënd”, tha ai.
Salianji theksoi se lëvizja e nisur prej tij ka prodhuar efekte konkrete brenda partisë, duke përmendur emërimet e fundit në strukturat e PD-së.
“Po nuk ikën këta që nga roje koteci, nuk fiton dot. Unë e kam arritur një qëllim. Me një kafe, njëri u bë kryetar. Më i votuari në listën e Durrësit u bë kryetar në Krujë. Tjetri pritet të jetë kandidat për Bashkinë e Tiranës. Nuk i përfillnin më parë. Si mund të thuhet që nuk kam arritur gjë? Edhe kjo është pjesë e strategjisë”, deklaroi ai.
Në fund, Salianji theksoi se beteja e tij nuk synon dëmtimin e PD-së, por rikthimin e partisë në një forcë konkurruese përmes votës dhe figurave që sjellin mbështetje.
“Nuk ndihmoj Berishën, unë do të shkoj te vota sepse dua që PD të fitojë. Nuk dua të shkatërroj PD-në. Figurat duhen për të sjellë njerëz, por nëse një figurë publike largon njerëzit, atëherë këtë problem duhet ta zgjidhim”, përfundoi ai.
Salianji deklaroi se protestat e PD po humbasin efektin dhe po demotivojnë qytetarët.
“Çdo protestë që organizojnë duke thënë se ka si objektiv qeverinë teknike apo rrëzimin e Ramës, e rrëzon vetëm në mendjen e vet. Kjo vetëm demotivon njerëzit. Ose protesta bëhet me një qëllim të caktuar, për të reaguar kundër korrupsionit dhe problemeve konkrete, ose humbet kuptimin”, u shpreh ai.
“Protesta që ka si qëllim politik largimin e Ramës dhe qeverinë teknike po zvogëlohet gjithnjë e më shumë. Ajo protestë është kundër meje. Është rezistencë për të mos ndryshuar. Është protestë kundër të gjithë njerëzve që mendojnë se Sali Berisha nuk duhet të jetë kryetar”, deklaroi Salianji.
Ai shtoi se mënyra si po organizohen protestat aktualisht po i shërben më shumë qeverisë sesa opozitës.
“Ai është shërbimi më i madh që i bëhet qeverisë. Vret nervin e protestës dhe shpresën”, tha ish-deputeti.
Në fund, Salianji u shpreh se qytetarët do të reagonin vetë ndaj qeverisë nëse lidershipi aktual i PD-së do të tërhiqej për një periudhë nga skena publike.
“Po të mos dilte fare lidershipi i PD-së dhe të rrinte dy muaj pa dalë në televizione, populli do të dilte vetë përpara qeverisë. Populli e kupton dhe e merr mesazhin”, përfundoi ai.
gijotina.com/
Discussion about this post