Katër persona të dyshuar si trafikantë refugjatësh u arrestuan dje në kufirin franko-belg në Dunkirk pas raportimit të lajmit se 27 refugjatë u gjetën të vdekur në kanalin Pas-de Calais.
Deri tani, ende nuk është konfirmuar nënshtetësia dhe kombësia e viktimave, por saktësohet se midis viktimave janë 5 gra dhe një vajzë e vogël. Sipas një burimi për “The Times”, u raportua se refugjatët që humbën jetën janë kurdë.
Kryeministri anglez Boris Johnson i kërkoi Francës se nevojitet prezencë e forcave britanike në Francë në mënyrë që të parandalohen “vrasjet” e refugjatëve, por presidenti francez Emmanuel Macron nuk i ka dhënë përgjigje rreth këtij propozimi
Më tej, Macron kërkoi mbledhje të ministrave europianë për të reaguar pas kësaj tragjedie humanitare. Ai bisedoi në telefon me kryeministrin Johnson duke rënë dakord për thellim të bashkëpunimit kundër fenomenit të trafikut të refugjatëve që shfrytëzojnë kanalin franko-anglez.
Nga ana tjetër, kryeministri Johnson u shpreh i dëshpëruar se fondi financiar prej 54 milionë paundësh për patrullimin e hyrjes së refugjatëve nga Franca nuk ka qenë i mjaftueshëm.
Tragjedia e djeshme konsiderohet më e rënda e ndodhur brenda një dite. Tetorin e kaluar, një familje me 5 persona kurdo-iraniane u mbytën në përpjekje për të shkuar drejt Britanisë së Madhe.
Discussion about this post