Reshjet e shiut gjatë natës së kaluar kanë përmbytur disa toka bujqësore në zonën e Kurbinit. Shkak është bërë mospastrimi i kanaleve kulluese dhe sipas banorëve në fshatin Fushë-Milot dhe fshatin Lap, uji rrezikon të dëmtojë prodhimet bujqësore.
Mësohet po ashtu, se prej përmbytjeve kanë ngordhur disa bagëti të imta. Siç kanë deklaruar fermerët, kjo situatë përsëritet çdo vit, por asnjëherë nuk dëmshpërblehen.
“Kam një metër ujë në arë, apel i kam bërë Perfekti e nënperfektit. Komplet ajo zonë është e mbytur me ujë, ta dijë qeveria. Emergjencat Civile të shohin familjet që kanë nevojë. S’pyet kush për ne!”, ka thënë njëri prej tyre.
“Kanali ka 20 vite që s’është pastruar. Jemi dhe pa drita prej tre ditësh, kemi shkuar 10,15 herë në bashki…por nuk pyet njeri”, ka shtuar një banor tjetër.
Një familje në Fushë-Milot jeton në kushte mjaft të vështira me banesën e dëmtuar nga tërmeti. E moshuara e cila jeton me burrin e sëmurë, i bën thirrje qeverisë që ta ndihmojë të strehohet.
“Kam shku në këmbë te Majlinda Cara. Pasha Zotin kam 4 vite kështu, kam ardhur me mijëra herë për t’u ankuar, asgjë s’është bërë. Nana s’ka shoqëri, asgjë. Fondet s’kanë ardhur, asnjë përgjigje s’më japin te bashkia! Mbrëmë kam fjetur në shi, s’i s’paska dhimbje shteti për dy të moshuar. I bëj thirrje shtetit ta ndihmojnë këtë nënë, po kërkoj shtëpi, jo vilë! Sa me më strehu”, tha e përlotur e moshuara.
Discussion about this post