Të paktën 50 persona kanë humbur jetën dhe dhjetëra të tjerë rezultojnë të zhdukur pas përmbytjeve të menjëhershme që goditën Teksasin. Ekipet e shpëtimit po vijojnë kërkimet, ndërsa autoritetet paralajmërojnë se numri i viktimave pritet të rritet.
Ditën e premte, shirat e rrëmbyeshëm përmbytën me shpejtësi disa zona në Qarkun Kerr, duke rritur me gati 8 metra nivelin e ujit të lumit Guadalupe, që vërshoi rrëmbyeshëm në shtëpitë përpara tij.
“Ne e dimë që lumenjtë do të ngrihen, por askush nuk e parashikoi këtë“, deklaroi Rob Kelly, gjykatës i Qarkut Kerr.
Ndërkohë, zyrtarë të Qarkut Travis raportuan për katër të vdekur dhe 13 persona të zhdukur, ndërsa një viktimë tjetër është konfirmuar në Qarkun Kendall. Ndërsa vijojnë kërkimet për të mbijetuarit nëpërmjet helikopterëve dhe dronë, autoritetet thonë se më shumë se 850 persona janë shpëtuar në 36 orët e fundit.
Zëvendësguvernatori i Teksasit, Dan Patrick, tha se shumë vizitorë kishin ardhur në rajon për të festuar Ditën e Pavarësisë pranë lumit, çka mund të ketë ndikuar në numrin e lartë të viktimave.
Qarku Kerr ndodhet në zonën Texas Hill Country, e njohur për terrenin e thyer, qytetet historike dhe atraksionet turistike.
Discussion about this post