Ministrja Olta Xhaçka ka takuar ambasadorin e Serbisë në Shqipëri Sllobodan Vukçeviq. Më pas Xhaçka ka shkruar në “Twitter” në lidhje me këtë takim ku pohon se njohja reciproke ndërmjet Kosovës dhe Serbisë është çelësi për ndërtimin e një të ardhmeje të qëndrueshme dhe të begatë të Ballkanit Perëndimor. Ndër të tjera, ministrja përmend dhe bashkëpunimin mes dy palëve të cilat kanë lënë pas të kaluarën.
“E mirëprita ambasadorin e Serbisë në Shqipëri, Sllobodan Vukçeviq. Shqipëria dhe Serbia kanë bërë përparim të dukshëm në lënien pas të kaluarës së vështirë. Ka ende punë për të bërë për të përmirësuar bashkëpunimin dhe lidhjet dypalëshe. Marrëdhëniet miqësore mes Shqipërisë dhe Serbisë, njohja reciproke mes Kosovës dhe Serbisë janë çelësi për ndërtimin e një të ardhmeje të qëndrueshme dhe të begatë për Ballkanin Perëndimor”, shkruan Xhaçka.
Ambasada e Serbisë në Shqipëri ka reaguar gjithashtu në lidhje me këtë takim, si dhe me statusin e ministres Xhaçka.
Në status ka një falenderim për shprehjen e gatishmërisë nga ana e ministres për të forcuar lidhjet mes dy vendeve. Gjithashtu nëpërmjet statusit bëhet me dije se ndërhyrja në punët e brendshme mes njëri-tjetrit nuk jep asnjë ndihmesë.
“Faleminderit, zonja Ministre, që shprehët gatishmërinë për t’i forcuar lidhjet – ne besojmë në tejkalimin e së kaluarës përmes bashkëpunimit dhe respektit. Ne gjithashtu besojmë se ka gjithmonë hapësirë për përmirësimin e bashkëpunimit, për sa kohë që ai bazohet në respekt – ndërhyrja në punët e brendshme të njëri-tjetrit nuk ndihmon”, thuhet në reagimin e ambasadës.
