Përndjek një vajzë deri te pallati, më pas djeg kabinën elektrike dhe e lë pa drita

Një i ri është arrestuar nga Policia e Tiranës, pasi akuzohet se ka përndjekur një vajzë deri te pallati i saj. Në pranga është vënë shtetasi A. B., 28 vjeç, i cili akuzohet se ka përndjekur një vajzë 24-vjeçare.

Por, bëhet me dije se kur vajza është futur në banesë, para se të largohej, 28-vjeçari ka djegur kabinën elektrike, duke e lënë pa drita të gjithë pallatin.

“Specialistët për Hetimin e Krimeve të Komisariatit të Policisë Nr. 6 arrestuan shtetasin A. B., 28 vjeç, pasi ka përndjekur deri në pallatin e saj një 24-vjeçare. Gjatë largimit nga pallati ka djegur një kabinë elektrike, duke shkaktuar humbje të energjisë elektrike në të gjithë pallatin.” – njofton Policia.

Materialet procedurale janë referuar në Prokurorinë e Tiranës për veprime të mëtejshme, shtuan të njëjtat burime.