Përpjekjet e SHBA-së për armëpushim në Liban dështojnë përpara zgjedhjeve

Përpjekjet amerikane për të ndalur luftimet midis Izraelit dhe Hezbollahut kanë dështuar – pasi SHBA-ja hartoi një propozim “jorealist” për armëpushim – dhe pas këmbënguljes së Izraelit për të qenë në gjendje të zbatonte një armëpushim drejtpërdrejt, sipas Reuters.

“Pa asnjë propozim të zbatueshëm në tryezë përpara zgjedhjeve presidenciale të së martës në SHBA, konflikti mund të zvarritet për muaj të tërë”, sipas një burimi politik libanez pranë Hezbollahut dhe dy diplomatëve të informuar për bisedimet. Të gjithë folën në kushte anonimiteti.

Një zyrtar amerikan tha se bisedimet mes të dërguarve të SHBA-së dhe zyrtarëve izraelitë të enjten dhanë rezultate më të mira sesa pritej.

Një zyrtar i dytë amerikan i përshkroi takimet si “konstruktive”, por tha se SHBA-ja nuk do të negocionte në publik.

Departamenti Amerikan i Shtetit (DASH) iu referua komenteve të sekretarit të Shtetit Antony Blinken, i cili tha se Izraeli dhe Libani po lëviznin drejt mirëkuptimit mbi atë që kërkohej për t’i dhënë fund konfliktit, por duhej më shumë punë.

Grupi i armatosur libanez Hezbollah dhe Izraeli kanë shkëmbyer zjarr për një vit paralelisht me luftën në Gazë, por luftimet janë përshkallëzuar javët e fundit.

Izraeli tha se ka zbuluar tunele dhe dyqane armësh të Hezbollahut në Libanin jugor dhe se grupi i mbështetur nga Irani kishte planifikuar një inkursion në Izrael – edhe më të madh se sulmi i 7 tetorit 2023 nga Hamasi.

“SHBA-ja hartoi një propozim armëpushimi 60-ditor që do të bënte që Hezbollahu të tërhiqej nga kufiri jugor i Libanit, të dyja palët të ndërprisnin sulmet dhe 10 000 trupa të ushtrisë libaneze të vendoseshin në jug”, sipas transmetuesit publik izraelit Kan.

Por, dy diplomatë thanë se përpjekjet diplomatike kishin dështuar pasi ai draft nuk ishte i zbatueshëm.

Një diplomat rajonal u bëri jehonë këtyre dyshimeve, duke vënë në dukje në mënyrë specifike elementet e një “dokumenti të njëanshëm” midis SHBA-së dhe Izraelit të publikuar nga Kan, e cila i jepte Izraelit të drejtën për të ndërmarrë veprime kundër kërcënimeve të pashmangshme për sigurinë e tij.

Diplomati e përshkroi këtë propozim si “të pafuqishëm”.

Qeveria e Libanit nuk e ka komentuar publikisht draftin, por zyrtarët thanë se këmbëngulja e Izraelit për “zbatimin e drejtpërdrejtë” të një marrëveshjeje do të shkelte sovranitetin e shtetit.