Policia e Shtetit ka dhënë detaje mbi ngjarjen e ndodhur mbrëmjen e sotme në fshatin Prush, në periferi të Tiranës, ku nga 3 persona të armatosur u tentua të grabitej një banesë.
E ndërsa një patrullë polici shkoi në vendngjarje pasi u njoftua nga pjesëtarë të familjes që banonin në banesën e piketuar, grabitësit kanë qëlluar me armë ndaj Policisë. Kjo e fundit i është kundërpërgjigjur po me armë, ndërsa nuk raportohet për persona të plagosur.
Ndërkohë në hyrje daljet e Tiranës janë ngritur pika kontrolli, ndërsa në aksion për kapjen e personave të dyshuar është angazhuar edhe RENEA. Dyshohet se grabitësit janë të armatosur me armë automatike kallashnikov.
Gjithashtu raportohet se grabitësit lëvizin me një automjet tip Audi të bardhë, por targat janë denoncuar të vjedhura.
“Më datë 09.12.2023, rreth orës 19:13, në fshatin Prush, përballë ambulancës, në banesën e shtetasit G. H., janë futur disa persona, të armatosur.
Me marrjen e njoftimit shërbimet e Policisë kanë shkuar menjëherë në vendngjarje, dhe në momentin që janë afruar afër banesës, tre personat e armatosur, kanë qëlluar me armë ndaj tyre.
Policia është përgjigjur me armë ndaj tyre. Shërbimet e DVP Tiranë, RENEA, Forcat Kombëtare të Sigurisë, po vijojnë krehjen e zonës dhe kanë ngritur pika kontrolli në të gjitha akset kryesore dhe hyrje-daljet e Tiranës, për identifikimin dhe kapjen e autorëve të dyshuar”, thuhet në njoftim.
Policia e Tiranës, sakaq thekson se për krehjen e zonës është vënë në lëvizje edhe forca RENEA.
Discussion about this post