Në lidhje me ngjarjen e rëndë të ditës së sotme në Tiranë, ku u regjistrua një konflikt me armë e sende të forta, janë zbuluar të tjera detaje.
Dyshohet se konflikti ka nisur pas një debati mes dy mësueseve, i ndodhur ditën e premte, konkretisht E.Q mësuese Letërsie dhe mësuesja e Historisë me iniciale D.T. Këto informacione janë bërë me dije nga një tjetër mësuese e cila ka dhënë dëshminë e saj të detajuar në lidhje me konfliktin.
Bazuar në deklaratë, ka qenë mësuesja e Letërsisë ajo e cila kishte lajmëruar të afërmit e saj, ku këta të fundit më pas erdhën të armatosur. Kanë qenë pikërisht këta persona, të cilët nuk e kanë lënë mësuesen e Historisë të shkonte në mësim, duke i kërkuar që dhe ajo të sillte familjarët për sqarim.
Bazuar në dëshmi, në momentin kur mësuesja e Historisë nuk po lejohej të futej në mësim, një i afërm i saj ka vënë re debatin dhe më pas ka ndërhyrë. Debati mes të dyja palëve ka degjeneruar deri në përdorimin e sendeve të forta dhe armës, nga ku mbeti i plagosur një 32-vjeçar.
Në lidhje me këtë ngjarje janë shoqëruar 5 persona, të cilët po japin deklaratat e tyre rreth ngjarjes.
