Përplasja me armë zjarri për një vajzë në Mamurras, merret vendimi për dy të arrestuarit

Gjykata e Kurbinit ka dhënë masat e sigurisë për dy nga personat e përfshirë në përplasjen me armë mesnatën e së dielës në Mamurras.

Gjyqtari Olti Skame pranoi kërkesën e prokurorisë për shtetasin Andi Diva që të dënohej më masën e sigurisë burg pa afat ndërsa për Devis Lleshajn është caktuar masa arrest shtëpie.

Ndërsa për dy personat e tjerë të arrestuar Alban Skonja dhe Gentjan Diva, masa e sigurisë do të zhvillohet ditën e shtunë në spitalin e Traumes në Tiranë ku qëndrojnë të shtruar për shkak se mbetën të plagosur nga përplasja me armë zjarri.

Kujtojmë që vëllezërit Kastriot dhe Armando Lleshaj nga Mamurrasi ngacmuan vajzën që ndodhej në shoqërinë e kushërinjve Gentian dhe Andi Diva dhe mikut të tyre Alban Skonja.

Dy grupet nisën debatit pranë shinave të trenit. Më pas në qendër të qytetit vëllezërit Lleshaj qëlluan në drejtim të mjetit tip Hundai ku ndodheshin tre personat e tjerë bashkë me vajzën.

Menjëherë 19-vjeçari Andi Diva u kundërpërgjigj me armë. Nga të shtënat u plagosën 39-vjeçari Alban Skonja, nga Durrësi dhe Gentian Diva, 40 vjeç nga Fushë-Mamurrasi.