Gazment Bardhi, kreu i Grupit Parlamentar të Partisë Demokratike, iu përgjigj akuzave dhe deklaratave të Lulzim Bashës, që anatemoi aksionin opozitar në Kuvend, por edhe të gjithë ata që janë rreshtuar kundër tij në rradhët e PD-së.
Bardhi me ironi shprehet se koha e zgjimit të opozitës me telekomandim ka marrë fund prej kohësh. Në një reagim në rrjetet sociale, Bardhi thekson se Basha e la për 12 vjet Partinë Demokratike në opozitës dhe se sot shpalli të vdekur 60 mijë anëtarë të partisë.
“Të të bëjë manual sesi bëhet opozita përgjegjësi kyç që e la partinë 12 vjet në opozitë, që shpalli sot të vdekur 60 mijë anëtarë të partisë vetëm se shprehin kundërshtinë për të kaluar nga dështimi në dështim, deputeti opozitar që ka nga 21 Mars 2022 që nuk vjen në Kuvend, që ska bërë asnjë kallëzim në prokurori kundër Qeverisë dhe asnjë denoncim ndaj Qeverisë, që ka 5 muaj që vjen vërdall si memec pa thënë asgjë mbi realitetin politik, edhe pse vendi po rrëshket në autoritarizëm, është për të qeshur dhe për të qarë njëkohësisht.
Koha e zgjimit të opozitës me telekomandim ka marrë fund prej kohësh. Opozita është në betejë me regjimin e Edi Ramës dhe beteja është e vetmja formë e përballjes me një regjim. Leksionet boshe mbi opozitën kemi 12 vjet që i dëgjojmë dhe realiteti kur zgjohesh nga ëndrra e gjumit të thellë është që Rama vazhdon të jetë Kryeministër! Shqipëria ka nevojë për ndryshim dhe kjo mund të arrihet vetëm duke qenë më së pari të vërtetë”, shkruan Bardhi.
Ndërkohë, Lulzim Basha e konsideroi gjuhën e përdorur nga Bardhi si një sulm që i shërben Edi Ramës. “Kjo është loja që pret Edi Rama dhe i shërben atij. Në ditët në vijim do të shikoni sulme edhe më të ashpra ndaj meje”, tha Basha, duke iu përgjigjur reagimit të Bardhit.
Discussion about this post