Gjykata e Apelit në Tiranë ka dalë me një njoftim zyrtar për përplasjen mes Enkelejd Alibeajt dhe grupit të Rithemelimit për njohjen e Kuvendit të 11 dhjetorit nga gjyqtari Agron Zhukri.
Gjykata njofton se shorti për caktimin e gjyqtarit relator do të hidhet sot në orën 15:30, në një proces të hapur në sallën nr. 2 të gjykimeve për të dhënë vendimin për ankimimin e Rithemelimit.
Nga ana tjetër, Gjykata e Apelit ka bërë thirrje që ndaj tyre të ndalen sulmet dhe të mos iu ushtrohet presion në punën e tyre, duke iu referuar indirekt atyre të bëra nga Komisioni i Rithemelimit.
“Referuar deklaratave tashmë të bëra publike, që shkojnë përtej debatit të brendshëm partiak, apo edhe opinioneve të shfaqura lidhur me këto zhvillime, Gjykata e Apelit Tiranë, e përgjegjshme për funksionin që i është ngarkuar, konsideron të papranueshëm çdo reagim dhe deklarim paragjykues, sulmues apo denigrues që synon të ushtrojë ndikim në marrjen e një vendimi të caktuar mbi këto çështje. Për një shtet të së drejtës, sulme të tilla ndaj gjyqtarëve dhe gjykatave, të cilat perceptohen si ndërhyrje e drejtpërdrejtë në veprimtarinë gjyqësore përpara marrjes së vendimeve prej tyre, janë të papranueshme ligjërisht dhe kushtetutshmërisht. Gjykata është dhe do të mbetet autoriteti i vetëm, që ka pushtetin dhe përgjegjësinë në dhënien e drejtësisë, ndaj si e tillë duhet respektuar”, njofton gjykata.
Discussion about this post