Këtë të enjte u rikthen protestat para Kuvendit, me qytetarë që protestuan para institucionit teksa zhvillohej seanca plenare.
Protesta u thirr nga PD pas publikimit të emisionit investigativ “Report” nga “Rai 3”, që nxori në pah fakte dhe dëshmi për lidhjet e kryeministrit Edi Rama dhe qeverisë së tij me personazhe të botës së krimit.
Protestuesit u shfaqën me pankarta me titujt e raportimeve të mediave të huaja ndër vite për lidhjet e qeverisë Rama me bandat dhe zyrtarët e korruptuar.
Protestuesit dogjën goma, ndërsa mbi to u vendosën pankarta me fytyrën e ministrit të Brendshëm Taulant Balla, ish-ministrave Fatmir Xhafaj, Mimi Kodheli, Olta Xhaçka apo sekretarit të Këshillit të Ministrave, Engjëll Agaçi dhe ish-shefit të Operacionales, Oltion Bistri, i cili u arrestua nga SPAK dhe iu sekuestrua pasuri me vlerë mbi 3 milionë euro.
Në disa momente, protestuesit kanë tentuar të çajnë kordonin e policisë teksa janë ndeshur me forcat e rendit. Këta të fundit kanë përdorur gaz ndaj tubuesve, disa prej të cilëve qëlluan me fruta drejt Kuvendit.
Efektivë policie si dhe protestues shfaqën shqetësime pas përdorimit të gazit.
Protesta zgjati rreth 2 orë e 30 minuta, me protestuesit të cilët e shprehën revoltën e tyre edhe nga një podium i krijuar enkas.
Ish-deputeti Belind Këlliçi dhe deputeti i përjashtuar këtë të enjte nga seanca plenare Flamur Noka ishin mes folësve në protestë.
Discussion about this post