Këtë pasdite u zhvillua protesta e pestë para Bashkisë së Tiranës për dorëheqjen dhe arrestimin e Erion Veliajt. Tubimi i nisur rreth orës 4 e 30 të pasdites zgjati gati tre orë dhe u shoqërua me tensione.
Në organizim, tubimi ishte i ngjashëm me paraardhësit. Me pankrata, thirrje dhe fjalime nga mikrofoni i protestës u lëshuan akuza kundër kryebashkiakut dhe u kërkua arrestimi dhe dorëheqja e tij. Nuk munguan goditjet me vezë ndaj godinës së bashkisë dhe molotovët.
Këtë të martë, protestuesit u përplasën me efektivët e policisë në disa episode, teksa kërkuan të hynin brenda ambienteve të bashkisë. Qëllimi nuk u arrit, ndërsa policia përdori dhe spraj lotsjellës ndaj pritestuesve. Disa prej tyre u shoqëruan.
Gjatë fjalimeve, këshilltari i Partisë Demokratike Ilir Alimehmeti tha se Veliaj kur u shpreh se u paraqit me inciativën e tij në Prokurorinë e Posaçme më herët gjatë ditës. Ai komentoi dhe deklaratat e kryebashkiakut pas daljes nga SPAK.
“Tani i quan bashkëpunëtorë (prokurorët e SPAK), me kë? Me ata që u arrestuan, apo me ata që i arrestuan? Erion Veliajt i iku truri kur iu vu sekuestro inceneratorit, edhe pse aty s’ka asgjë. I arrestuan Taulant Tushen, në mars, i arrestuan live drejtorët e tjerë. Ku po fshihej ai? Ai kampioni i debateve që nuk doli njëherë në debat me Këlliçin. Ai që i çojnë 3 fletëthirrje dhe thotë shkova me këmbët e mia. Po normal se do të tërhiqnin ata përndryshe. Ai që nuk guxon të flasë në këshill kur ia kërkojnë 3 forca të ndryshme politike. Ai guxon vetëm me këta njerëzit me maska, që kanë frikë, pas këtyre dyerve me zinxhir”, u shpreh ai.
Anëtari i kryesisë së PD-së Belind Këlliçi paralajmëroi arrestime të tjera në Bashkinë e Tiranës.
“Janë një sërë drejtorësh që presin të strehohen tek shokët e tjerë të 5D, si Herion Rrapaj e të tjerë. Banditi i Zall Herrit Arben Maloku, të gjithë e keni vendin aty ku ndodhen drejtorët e tjerë. Ne nuk tërhiqemi. Është rast unikal në Shqipëri, që një kryetar bashkie tregohet me gisht si përfitues dhe pronar faktik i inceneratorit të Tiranës”, tha Këlliçi.
Mbylljen e protestës dhe orarin e tubimit të ardhshëm (të martën ardhshme në 11:00) e njoftoi Adriana Kalaja, përfaqësuese e Aleancës për Mbrojtjes e Teatrit e njëkohësisht edhe e PD-së. Ajo u bëri thirrje protestuesve që ti bashkohen tubimit në mbështetje të kryedemokratit Sali Berisha, poshtë banesës së tij të fundit.
Protestat te Bashkia Tiranë nisën pas arrestimeve të drejtorëve të Veliajt lidhur me aferën “5D”. Gjatë fjalimeve nga mikrofoni i protestave, qytetarë dhe anëtarë të opozitës e kanë cilësuar Veliajn “kokën e bandës së drejtorëve hajdutë” dhe “pronarin faktik të inceneratorit të Tiranës”.
Discussion about this post