Kuvendi ka nisur me debate për çështjen e Belinda Ballukut.
Kreu i grupit të PD, Gazment Bardhi kërkoi që t’i hiqet imuniteti Ballukut, duke akuzuar mazhorancën se është kthyer në mburojë të saj dhe se kanë penguar SPAK.
Ai u shpreh se pas vendimit të Gjykatës Kushtetuese, nuk ka më asnjë pengesë që diçka e tillë të ndodhë, ndërsa ka akuzuar mazhorancën se janë bërë pengesë për hetime në lidhje me korrupsionin.
“Zoti kryetar i kuvendit, kuvendi i Shqipërisë në axhendën e tij duhet të ketë vetëm një pikë që ju keni dy muaj që e mbani zvarrë e tërhiqni zvarrë, duke e kthyer kuvendin e Shqipërisë institucionin e vetëm në botë që bëhet bunker ndaj zyrtarëve të korruptuar. Dhe kjo çështje është futja me urgjencë në rend dite e kërkesës së prokurorisë për të hequr imunitetin e zëvendëskryeministres Belinda Balluku.
E justifikuat shtyrjen fillimisht me kohën që kërkoi avokati mbrojtës tre javë për të mbrojtur korrupsionin e Belinda Ballukut. Na thatë, pasi skadoi tre javët e kërkuara, që do të presim vendimin e Gjykatës Kushtetuese. Për dy muaj i mbushët kokën shqiptarëve që një zëvendëskryeministër apo ministër nuk mund të pezullohet se gëzon imunitetin e deputetit. Morëm përgjigje nga Gjykata Kushtetuese që pezullimi nga detyra, 8 me 0 madje, nuk hyn fare në çështjen e imunitetit as të deputetëve, as të ministrave. Pas vendimit të Gjykatës Kushtetuese, nxorrët një tjetër justifikim, do presim të zbardhet vendimi i Gjykatës Kushtetuese.
Dhe për dy muaj jeni bërë pengesë për hetimin e korrupsionit ndaj zyrtarëve të lartë. Prandaj dhe nuk duhet të bëhemi hipokritë zoti kryetar. Miratojmë kalendare e program pune ku ky kuvend ka dështuar për dy muaj të përmbushë një funksion kushtetues në interes të qytetarëve, siç është pranimi i kërkesës për heqjen e imunitetit të Belinda Ballukut. Prandaj dhe deri në atë moment, ky kuvend nuk mund as të funksionojë normalisht, as të bëjë sikur ajo çështje nuk ndodhet këtu, dhe as të na njoftoni që përmes një ligji keni vendosur t’i jepni mbrojtje politike kryeministrit dhe ministrave nga veprimet hetimore të prokurorisë së posaçme.
Jeni i vetmi vend në botë që miratoni një ligj për të mbrojtur veten. Dhe është në turpin e këtij kuvendi, por dhe të kolegëve të mi të mazhorancës, një pjesë prej tyre nuk kanë asnjë lidhje me korrupsionin dhe nuk duhet të pranojnë kurrë që të shndërrojnë këtë sallë në mburojë për të korruptuarit. Prandaj zoti kryetar, në kalendar do të duhet të fusni me urgjencë heqjen e imunitetit të zëvendëskryeministres, t’i hapni rrugë hetimeve të prokurorisë, t’i hapni rrugë çdo mase që kërkon prokuroria ndaj cilitdo që të shkojë dhe të përballet si i barabartë përpara ligjit për çdo akuzë që ngrihet nga Prokuroria e Posaçme”, u shpreh Bardhi.
Kryetari i Kuvendit, Niko Peleshi replikoi me Gazmend Bardhin, pasi ky i fundit kërkoi shqyrtimin e menjëhershëm të kërkesës së SPAK për t’i hequr imunitetin Belinda Ballukut, e marrë zyrtarisht nën akuzë nga SPAK.
Peleshi në seancën e sotme plenare pretendoi se Këshilli i Mandateve nuk ka shkelur asnjë nen dhe se është brenda afatit për të shqyrtuar kërkesën e SPAK.
“Lexoni Rregulloren para se të bëni fjalime patetike. Asnjëherë nuk e ke kontestuar interpretimin që kryetari i Kuvendi i bën rregullores, se në fakt nuk ka nevojë shumë për zgjuarsi se është e qartë. N e kemi një afat për rregulloren. Veprimtaria e Këshillit të mandateve nuk ka shkelur asnjë nen dhe afat, jemi brenda të afatit.
Për pak ditë, të hënën, do të zhvillomë mbledhjen pasi është respektuar e drejta e të gjitha palëve. Këshilli nuk është organ vendimmarrës por këshillimor. Kryetari i Këshillit të Mandateve është i detyruar të respektojë opinionet të gjithë palëve. Misioni im është ta mbaj në normalitet kuvendin”, u shpreh ai.
Discussion about this post