Gjatë zhvillimit të mbledhjes jashtë radhe në Këshillin Bashkiak të Vlorës këtë të hënë, dy të rinj kanë hyrë në ambientet e sallës ku po mbahej takimi.
Njëri prej tyre ka ndërhyrë në mbledhje duke hyrë në konflikt verbal me këshilltarët. I riu deklaron se banesa e tij është shembur dhe kundrejt kësaj nuk ka marrë shpronësimin dhe shton se si rasti i tij, ka dhe shumë qytetarë të tjerë në Vlorë.
“Kam 5 vjet dhe nuk po na shpronëson asnjë. Jetoj te Porti, tani jam pa banesë. Disa i kanë marrë disa jo shpronësimin. Ma kanë prishur shtëpinë dhe lekët nuk mi kanë dhënë. Kam komunikuar me të gjithë dhe të gjithë e anashkalojnë duke thënë se kemi mbledhje ndërkohë unë nuk dua t’ia di për mbledhjet e tyre. Unë si qytetar kërkoj të drejtën time. Pritjet tona janë skandaloze. Na thanë se nuk prishim shtëpi pa marrë shpronësimin. Shkuan i prishën dhe shpronësim nuk morëm. Asnjë nuk kthen përgjigjie. Si puna jonë është e gjithë lagjia , rreth 25 veta”, tha qytetari nga Vlora.
Menjëherë në vendngjarje ka mbërritur Policia e Shtetit, e cila ka bërë të mundur largimin e të rinjve nga ambientet e Këshillit Bashkiak dhe shoqërimin e tyre në polici.
Siç mësohet të rinjtë të cilët kanë reaguar për shkak se ju është shembur banesa në zonën pranë portit detar për shkak të një projekti rehabilitues aty dhe kanë mbetur pa shtëpi.
Discussion about this post