Vazhdojnë përplasjet në komisionin e Veprimtarisë Prodhuese, për problemet me energjinë. Ministrja e Energjisë dhe Infrastrukturës Belinda Balluku ka debatuar me deputetin demokrat Helidon Bushati në lidhje me nivelin e kaskadës së Drinit.
Ky i fundit vuri në dyshim nivelin e deklaruar nga Balluku, duke deklaruar se do të marrë në telefon persona përgjegjës që monitorojnë këtë kaskadë. Sipas tij, qeveri gënjen, mashtron me shifrat për të mbuluar abuzimet e bëra, pasi kanë shitur energji deri në korrik kur në fakt duhej të fillonin të ruanin rezervat. E revoltuar Balluku u shpreh se ajo para të dhënat, të cilave u referohet.
“Ti tani mos merr rojën te dera se është turp. Unë i kam të dhënat këtu. O zotëri i nderuar, unë i referohem shifrave. Nuk ka nivel normal, ka nivel teknik dhe për sa kohë optimizohet kaskada edhe shifrat bëhen pozitive. Nuk e di kush t’i thotë këto histori, roja atje apo se di. Nëse Komani ka 100 metër kub në sekondë ne nuk prodhojmë. The që keni shitur në korrik. I dashur. Vazhdoj unë me shifrat e mia. Prandaj qeshim ne se ne i njohim shifrat. Pas muajit korrik niveli i Fierzës ra dhe për të siguruar furnizim për periudhën e shtatorit dhe tetorit u programua import për muajt në vazhdim. u programua vetëm për humbjet”, tha Balluku.
Ndërkohë ditën e djeshme Ardian Çela, administrator i OSHEE tha se kanë shitur energji deri në mes të qershorit dhe kur prurjet filluan të bien shitjet u ndalën. Por, për opozitën kjo nuk është e vërtetë.
