Prej më shumë se dy javësh në Kuvendin e Shqipërisë ka një situatë tensioni, ku opozita proteston me argumentin se mazhoranca e Kryeministrit Edi Rama po shkel të drejtat e saj kushtetuese, ndërsa socialistët vijojnë procedurat parlamentare në një përpjekje për të treguar se asgjë nuk po ndodh.
E ndërsa deputetë të opozitës po artikulojnë idenë e një greve urie nëse socialistët nuk reflektojnë, mazhoranca në anën tjetër po sheh mundësinë e zhvillimit të mbledhjeve të komisioneve dhe seancave plenare “online” duke shmangur në këtë mënyrë rolin bllokues të deputetëve demokratë.
Por gazetari Armir Shkurti për Euroneës Albania, duke komentuar situatën dhe përplasjet në Kuvend, e konsideron aksionin e fundit opozitar si një spektakël të ngjashëm me atë që ka ndodhur në sallën e Parlamentit në 32 vite.
Sipas tij mesazhi i “revoltës të paqenë” i drejtohet militantëve dhe ndërkombëtarëve.
Shkurti thekson se gjatë gjithë viteve të Shqipërisë post-komuniste palët kanë dhuruar spektakël, herë duke u hequr si luftues të korrupsionit kur janë në opozitë dhe duke marrë “rolin” e të korruptuarit kur kalojnë në maxhorancë.
“Në ’69-ën ka dalë një libër që ka bërë epokë që titullohet “Shoqëria e spektaklit”. Lum kush e kupton që ne jetojmë në shoqërinë e spektaklit. Këto që shikojmë nuk janë nerva të vërteta dhe nuk janë revolta të vërteta. Këto janë thjesht spektakël. Ky është një kod me të cilin flitet në radhë të parë me militantët dhe në radhë të dytë me ndërkombëtarët. Kështu ka qenë gjithmonë. Dilte Enver Hoxha përshëndeste me dorë nëpër tribuna dhe pastaj transmetohej në koncerte, në filma artistike dhe dokumentare. Filloi demokracia dhe kështu u krijua spektakli që pala në opozitë është e revoltuar me pushtetin e hajdutëve dhe do të luftojë për të drejtat e popullit dhe me rotacion këtë rol e merr aktori tjetër, i cili kishte rolin e të mirit më përpara”, tha gazetari.
Discussion about this post