Deputeti demokrat Ervin Salianji, duke komentuar situatën në Partinë Demokratike, tha se ka një tentativë për të marrë peng këtë parti, veprim ky që i shërben regjimit të Edi Ramës.
Në Panorama Tv, Salianji tha se po punohet për ta bërë PD-në një parti në shërbim të një personi të vetëm.
Deputeti demokrat tha se 14 maji tregoi se edhe në ditën më të keqe, PD mbledh 500 mijë votues. “Ka një pengmarrje të PD-së për interesa të regjimit dhe regjimi nuk po na jep të drejtën të shprehim mendimin tonë”, tha deputeti Salianji.
Referuar mbledhjes së Këshillit Kombëtar, Salianji tha se ka parë individë që kanë dhënë kontribute në PD, sikundër ka parë edhe individë që nuk i kishte parë asnjëherë më parë, apo që të kenë qenë pjesë e kësaj partie.
“Mbledhja e një grumbulli të caktuar njerëzisht i mbledh kushdo. Në dasma mblidhen më shumë se aq njerëz. Por kjo nuk do të thotë se është këshilli kombëtar i PD. Kjo nuk i bën të kenë tagrin e këshillit kombëtar të PD. Aty kishte një grup demokratësh që kanë një mendim të caktuar. Pashë fytyra të tjera që nuk i kam parë ndonjëherë në PD. Kemi një pengmarrje të vulës së logos për ta kthyer në shërbim të një individi. Ne e kemi detyruar të dorëhiqet kur kemi qenë në mbledhjet e pas 6 marsit. Tani po shpërfaqet për të treguar që kërkon ende t’i bëjë më shumë dëm opozitës dhe demokratëve dhe t’i shërbejnë qeverisë”, deklaroi ai.
Lidhur me datën 29 korrik, kur PD zyrtare ka vendosur të mbajë zgjedhjet për kryetarin e ri, Salianji u shpreh se nuk ka as zgjedhje dhe as kandidatë, por një proces që nuk i shërben demokratëve.
“Ç’lidhje ka ky me kandidimin për PD. PD është partia më e madhe e opozitës. Është një parti që edhe në ditën më të keqe mbledh 500 mijë votues. Nuk ka kandidatë, nuk ka proces, nuk ka zgjedhje por një pengmarrje të PD për interesa të regjimit. Në këtë diskutimin e sotëm është e qartë që nuk ka as garë dhe as proces dhe nuk i shërben demokratëve”, tha Salianji.
Discussion about this post