Gazment Bardhi vijon të kundërshtojë skenarin e një grupi anëtarësh të Kryesisë së PD-së zyrtare, që kanë vendosur zgjedhjen e kreut të ri të kësaj partie në 29 korrik.
Deputeti demokrat, i cili mban edhe funksionin e Sekretarit të Përgjithshëm, i është drejtuar Kryesisë së PD-së me një kërkesë, për tu mbledhur dhe thirrur mbledhjen e Këshillit Kombëtar, të cilin e konsideron një strukturë funksionale, që ka kuorumin e nevojshëm për të marrë vendime. Bardhi shprehet se bazuar në statutin e PD-së, ky forum është i vetmi që mund të vendosë mbi procedurat e zgjedhjes së kryetarit të partisë.
“Sipas pikës 1 dhe 6/a të nenit 4 dhe nenit 53 të Statutit, hapja e zgjedhjeve për Kryetar të Partisë, si një nga vendimet më të rëndësishme në një parti politike, përfshirë edhe miratimi i personave përgjegjës që administrojnë procesin (Komisioni Zgjedhor), është kompetence e Këshillit Kombëtar”, thekson Bardhi në shkresën që i ka drejtuar anëtarëve të Kryesisë së PD zyrtare.
Gjithashtu ai evidenton se me vendimin e mëparshëm Kryesia ka shkelur statutin duke iu dhënë kryetarëve të degëve dhe grupit të punës të drejtën për evidentimin apo përditësimin e anëtarësisë.
“Sipas Statutit, autoritetet e vetme përgjegjëse për këtë janë Sekretari i Degës, Kryesia e Degës së Partisë dhe Sekretari i Përgjithshëm. Statuti nuk përcakton as Kryetarin e Degës dhe as grupin e punës të ngritur prej tij si autoritete statutore lidhur me evidentimin e anëtarësisë apo përditësimin e saj”, sqaron Bardhi.
Në vijim, deputeti demokrat shprehet se Komisioni Zgjedhor funksionon vetëm pas miratimit nga Këshilli Kombëtar dhe se pa u miratuar ky organ nga Këshilli nuk mund të ketë proces zgjedhor.
“Në të kundërt, mungesa e mbledhjes së Këshillit Kombëtar do të pamundësonte mbajtjen e zgjedhjeve në datën 29 Korrik 2023 dhe zbatimin e vendimit të datës 6 Qershor 2023 të Kryesisë së Partisë, për shkak të mungesës së miratimit të Komisionit Zgjedhor”, paralajmëron Bardhi.
Referuar zhvillimeve në PD-në zyrtare me shumë gjasë kërkesa e Gazment Bardhit nuk pritet të merret parasysh, ndërsa disa prej anëtarëve të Kryesisë kanë vendosur zhvillimin e një mbledhjeje pasditen e së enjtes, për të vijuar me procedurat në funksion të realizimit të zgjedhjes së kryetarit në 29 korrik.
Discussion about this post